【奧斯卡前瞻】最佳影片 今屆好難估！

嚟緊嘅星期日就係奧斯卡頒獎禮，我地會一連五日估吓評吓各個入圍單位。一如往年嗰句，「專業推介不代表個人心水」，各個獎項係由數以千計美國電影業界人士投選，佢地喜愛唔一定係年度最佳，所以今年繼續會預測邊個得獎，同埋我想邊個贏！

「各套入圍電影實力平均」怕且係各位同行成日寫稿會用嘅一句，不過今年真係老土都要講句「勢均力敵」，因為冇咩邊套會覺得「吓？佢都有份？」。

稍為秤輸嘅會係《上流寄生族》，最佳外語片應該實食冇黐牙，但係睇返上年同樣案例嘅《羅馬》，聲勢口碑都強勁仲要十項入圍，即使拎埋最佳導演都係無緣壓軸大獎，唔係自己人的確比較難攻頂。

講起《羅馬》，同樣道理，《愛爾蘭人》同《婚姻故事》都怕且贏面稍低，因為呢3套戲都係Netflix出品，而美國電影業界人士對影片串流平台仍然係有保留，史提芬史匹堡就認為「串流平台電影只係電視電影」，加上利字當頭，俾面你入圍當贏架啦。

上年好多人大讚嘅《JOKER小丑》，撇開祖昆馮力士嘅超水準演繹，套戲其他方面都略有不足，中間心理描寫拉得太長（亦因為咁祖昆馮力士先有戲好做）；如果有最佳整體演出，《小婦人》一眾演員嘅交流互補係應該得獎，跳躍式敘事亦都拿掐準確，只係要打低咁多套咩？又未夠好喎。《極速傳奇：福特決戰法拉利》出奇地坊間反應不錯，但係神奇地4項提名當中3項都係技術獎，向來要拎「最佳電影」都起碼搭一個最佳劇本／導演／男女主角，所以呢……你睇吓上年《黑豹》？

好嘞，剩返三套，分別係《從前，有個荷里活》、《1917：逆戰救兵》及《陽光兔仔兵》！《從》同《1917》各自喺金球獎拎到所屬片種嘅「最佳電影」，打和。而每年奧斯卡最佳電影都會同社會議題有關連，自從特朗普上台，「多元」係一個電影界力求推祟嘅價值，有黑人、同志元素嘅《綠簿旅友》（2018年）、《月亮喜歡藍》（2016年）都贏得評審手上一票。今年呢？美國人仲係鬧緊特朗普，題材稍為貼近嘅《爆炸性醜聞》又跑唔出，呢三套心水今屆冇邊套有優勢。

另一個捉路方法係……大會想以呢個獎俾人睇到「荷里活出品」係咩水準。照咁睇，力sell「一個鏡頭到尾」嘅《1917》，由技巧以及題材都最有「大片格」，略為佔優。題外話，奧斯卡近年幾歡迎塔倫天奴，如果佢一次過拎齊最佳劇本同最佳導演，我唔意外。

不過最佳電影個人心水係《陽光兔仔兵》。首先導演Taika Waititi係近年睇好導演之一，早年作品Flight of the Conchords 充滿edgy笑位，後來將呢類風格注入Marvel之中最難搞嘅《雷神》系列，成功將套戲起死回生。《陽》夠膽拍納粹／希特拉敏感題材，仲要係喜劇，一時失手隨時收山！但係《陽》識得用小朋友角度切入，笑得嚟沉重，整體水平唔差過《1917》同《從》。由於評審唔少係影評人，《陽》喺北美影評口碑相當好，都有機會黑馬跑出！

估計贏家︰《1917：逆戰救兵》

個人心水︰《陽光兔仔兵》

入圍影片－

《1917：逆戰救兵》

《極速傳奇：福特決戰法拉利》

《陽光兔仔兵》

《JOKER小丑》

《小婦人》

《婚姻故事》

《從前，有個荷里活》

《上流寄生族》

《愛爾蘭人》