【奧斯卡前瞻】最佳女配角 Laura Dern一支獨秀 官方twitter都買佢贏！

今日繼續奧斯卡金像獎賽果預測。通常最佳男女主角、最佳男女配角比較易估，無咁多爆冷賽果。今年都唔例外，尤其最佳女配角一共有5位入圍女星，位位都係白人女星，「多元」唔係考慮因素。今年又無特別政治議題，邊個跑出純粹睇「戲勢」，所以女配角其實只係其中2位之爭，其他通通陪跑！

個人心水係《小婦人》中飾演妹妹Amy嘅Florence Pugh 。戲內嘅佢神采飛揚，將自我中心、小小自私任性嘅Amy演得活靈活現；角色好踩界，演多一分力隨時變世界級極黑人憎港女，不過佢無，仲幾惹人憐愛嗰下勁。Florence Pugh年紀輕輕，貴為新星嘅佢其實早以《馬克白夫人的誘惑》成為英國獨立電影獎影后。可惜《小婦人》喺其他頒獎禮無咩收獲，爆冷攞奧斯卡機會渺茫，但相信Florence Pugh都未必介意，因為傳聞佢會接棒做Marvel第二代黑寡婦，星途一片光明！

另一陪跑仲有「小丑女」瑪歌羅比，佢喺《爆炸性醜聞》內飾演電視台新聞小花，充滿野心嘅佢主動去高層面前爭取機會，結果被上司性騷擾，流露出小鹿般無助眼神。3位女星同場鬥戲，但係另外2位阿姐（妮歌潔曼、查莉絲花朗）明顯更有火，同瑪歌羅比前作表現做比較，其實都只係不過不失，我反而覺得同場嘅妮歌潔曼更值得提名。

至於《陽光兔仔兵》做正義阿媽嘅施嘉莉祖安遜，今屆同時憑《婚姻故事》獲提名最佳女主角。唔做漫威「黑寡婦」嘅佢表現亮眼，同時提名兩項大獎非常難得，可惜因為「黑寡婦」太深入民心，頂多有提名攞獎就未必，因為奧斯卡偏愛好戲之人，拍開商業片嘅演到曉飛都無咩獎攞，你睇里安納度迪卡比奧就知。

結果最佳女配角係《婚姻故事》嘅羅娜丹同《李察朱維爾：驚世疑案》嘅嘉菲比絲之爭。以戲論戲2位女星可謂勢均力敵，不過有無獎攞好靠宣傳做勢，《李》由上畫宣傳到提名造勢明顯唔夠力，票房反應一般又唔夠口碑傳頌，分分鐘未必個個評審委員睇過《李》，正路都唔會投票俾啲無印象嘅戲。

《婚姻故事》於各大電影獎掃咗唔少提名，不過真正得獎只有最佳女配角一項，羅娜丹已經憑離婚律師Nora一角分別奪得金球獎、英國電影及電視藝術學院（BAFTA)、美國演員工會獎、AARP電影成人獎、影評人協會等7個女配角獎項，連奧斯卡自己官方twitter玩預測都係羅娜丹攞最佳女配角，睇嚟無咩差池，攞硬小金人！

估計贏家︰《婚姻故事》羅娜丹

個人心水︰《小婦人》Florence Pugh

入圍名單 －

《婚姻故事》羅娜丹

《李察朱維爾：驚世疑案》嘉菲比絲

《小婦人》Florence Pugh

《爆炸性醜聞》瑪歌羅比

《陽光兔仔兵》施嘉莉祖安遜