男友唔同自己去旅行 反而同兄弟出門？ 男子遊的5個好處

相信各位女友，無論係咩年齡，有時都會發現自己成日好想同男朋友去旅行時，男友就會岀現一副其實好想同兄弟去旅行嘅樣子。可能女友們都會諗唔明，到底男友係覺得同自己去旅行去得太多開始悶，定嫌自己想去嘅地方總係同佢不同，所以佢會有咁嘅反應。其實，無論男定女，有時都會想同好兄弟或者好姐妹去玩，並唔代表係你嘅問題，只係同best friend去，總會份外開懷。

1.做翻自己

同女朋友去旅行，好多時都要小心自己嘅行為，例如望女仔唔可以咁明顯，講嘢都唔會吓吓咁爛口 ，有時真係玩得唔盡興。但係兄弟面前，唔使講都知你諗乜，做翻自己最舒服。

2.口味一致

做得兄弟嘅，通常都有啲差唔多嘅興趣，好似係鍾意嘅球隊、運動等，去旅行嘅時候想去嘅景點又或者想做嘅事自然比較相近，唔使驚喜又唔洗單方面遷就。

3.咩都講

去旅行有拗撬就一定在所難免，但做得兄弟嘅有咩唔滿意都會三口六面講出嚟，講咗出嚟大家討論再去解決，唔似得同女朋友去嘅時候，有咩滿意都會收收埋埋要你去估，估完又要氹。

4.唔洗遷就女友

如果同女朋友去旅行，好多時都要遷就對方好似要陪佢行街買嘢，又或者陪佢着傳統服飾影相，連食嘢都要就佢嘅口味，變咗好多時未必做到自己想做嘅事，但係同兄弟去就可以唔使咁顧慮，而係互相遷就。

5.壯膽

去外地玩好多時難免會玩啲挑戰膽量嘅活動，同兄弟一齊去就可以互相為大家壯膽，而且大家都唔想冇面所以會容易放得開，往往會可以挑戰到自己。

相片來源：tylerknott@tumblr