日男耳機太大聲被警告 竟然推人落月台 日本坐車的4個潛規矩

去日本旅行,電鐵係一種好重要嘅交通工具。不過,早前日本嘅JR芧崎車站就發生咗一件危險事。事關有年輕人在車上被提醒耳機開得太大,佢一怒之下就將人推落月台,仲要踢咗人幾腳,幸好最後沒事!幾時都話,日本人規矩多多,尤其係坐鐵路個陣,人多擠迫自然產生好多磨擦,所以遊客去到當地要留意潛規矩,唔好無啦啦得罪人而不自知,以下會同你分享4個遊日搭電鐵嘅貼士:

1. 將背囊向前揹

遊客如果撞正電鐵車廂多人時,要將背囊向前揹或放上行李架。除咗省位之外,仲可以避免同其他乘客身體接觸。事關日本人對於身體接觸比較敏感, 所以避免背包撞到旁人,造成尷尬,背囊都係放係前方比較適合。

2. 保持車箱安靜

日本車廂真係靜過圖書館!除咗規定乘客手機要較靜音之外,都唔容許講電話同喧嘩。如果你想係車箱內睇片、聽歌,最好載番耳機欣賞,但又唔好太大聲,唔好騷擾到旁人!

3. 讓座予有需要人士

日本有別於香港,當地嘅優先座係每人都可以坐,只要見到老人家、殘障人士等有需要人士再讓坐就無問題!但讓座都有技巧,為了顧及對方的面子,最好係靜靜地起身扮落車。

4. 留意標記

除了老人家、殘障人士之外,如果見到乘客身上配戴孕婦徽章或者紅色十字標記(Help Mark)都代表他們有讓座嘅需要,即使唔係坐緊優先座都記得要讓位。

(圖1,來源pagecup)