香港高爾夫球 不如融入大灣區

粉嶺高爾夫球場命運惹人關注，有高爾夫聯盟明言如果收回場地，就會毀滅香港高球圈，從此無人識打波；而支持收回意見就覺得，不論收回土地係起公屋或醫院，或者收回市值租金，總之背後釋放的經濟價值，令人期待。

其實筆者覺得，香港未來的大形勢都係以大灣區去思考，不如由高球作先鋒，率先帶領香港人，融入大灣區。

首先神州地大物博，高爾夫球靚場絕不比粉嶺場地遜色。

講打波極致享受，單單一個新世界中國廣佛地區樓盤（廣佛新世界）可以已經KO粉嶺高球場（唔計觀瀾湖），其高球場佔地1100畝，比粉嶺大一倍有多，區內仲有高球會，是南中國唯一GEO認證球場，連續十年歐洲挑戰巡迴賽舉辦場地，香港人去到又能與國內好手較量，進步必定神速。

君不見上年年底塘廈高爾夫球博覽會，兩大會場650展位雲集海內外130多家高爾夫企業，會上舉辦粵港澳大灣區高爾夫產業發展論壇，有聲有色；去過嘅球迷，唔使筆者多講，如果唔係內地之前爆出有球會結業賠款不合理嘅制度問題，好多香港人一早已經北望神州。

要振興一個行業，唔只要場地休閒打波，而是要多辦賽事。呢一點內地都做得多，上年大灣區先舉辦過系列賽，由廣東省體育局主辦，廣東省高協、香港高球總會、澳門高球總會共同承辦，一共舉辦了業餘賽、青少年賽、職業賽三項賽事，全中國10個城市共選派了36名男選手、27名女選手參賽。

以前就話，香港要有高球場，留住高管專才，但今時今日香港要輸出人口去大灣區，不如籍香港高爾夫球歷史悠久的優勢，用高爾夫球打開話閘子，帶專才返內地傾生意，極速融入大灣區建設，你說好不好？事實上，已有商會以高爾夫球活動作交流，下一步，應該快點在內地多佔高球場？2017年塘廈鎮高爾夫產業產值達22.75億元人仔，香港人又能否從中分一杯羹。

不過唯一缺點，融入大灣區後，可能就是到內地打波路途遙遠，阿叻等高球好手便會開銷大增，而且不能常常練習，自然技不如人。但筆者相信，只要有恆心，去邊度打波都可以「我至叻」。

===============

精選資訊網站「中環街市」 臉書粉絲頁