貴州茅台連股票都玩限量

A股股王貴州茅台兩日加埋升逾50元人仔，爆升力傲視環球股壇。貴州茅台可以升得咁誇張，關鍵原因可能係流通股份都玩限量。

如果你係穩陣派投資者，應該會對貴州茅台股價爆升不明所以。52週高低價相差一倍，早輪爆出高層「以酒謀私」醜聞，前董事長又因受賄被起訴，最大鑊係連「國酒茅台」商標都被DQ要改用「貴州茅台」品牌。

但在見慣風浪的內地投資者眼中，壞消息都可以用正面角度解讀，高層落馬後新人上場管理上揸返正，代表以往冤枉去的貪腐混賬可以轉化為利潤，只要銷情維持強勢，貴州茅台在下半年將更有機會交出破紀錄靚數。

至於銷情，「國酒茅台」及「貴州茅台」都係深入民心品牌，所以改商標問題不大，而且據悉今年中秋茅台銷情繼續強勁，自然增加內地股民炒高股王的信心。

而更關鍵因素，係貴州茅台街貨股份一如其產品都係限量流通，翻查貴州茅台持股比例，中國貴州茅台酒廠（集團）有限責任公司及貴州茅台酒廠集團技術開發公司加起來佔64.2%，經滬股通持有貴州茅台外資佔8.45%，前者固然係長揸好倉，外資覺得貴州茅台有股王光環兼業務實在、銷售額靠譜，而且街貨唔多容易炒上，亦樂於與內地散戶合力炒起貴州茅台。

當然對散戶來講，用逾11萬人仔追入一個高增長夢想似乎太奢侈，特別是面對中國經濟放緩的隱憂，吸金力超強的貴州茅台會否獲邀涉足與本行九唔搭八的項目，甚至注資救銀行，一旦出現這些風聲，就可能是觸動外資頭也不回沽貨的訊號了。

===============

精選資訊網站「中環街市」 臉書粉絲頁