示範單位新玩法 搵老臨扮住客!

 

賣樓業主務求得到好價錢出貨,除咗執靚間屋「化行妝」之外,仲可以點做?   喺外國賣二手屋,有經紀會擺晒傢俬佈置好晒,等買家唔駛估估下個廳夠唔夠擺梳化茶几座地燈。   加拿大卡加里有個經紀,將呢種幫層樓「化妝」嘅絕技再上一層樓,就係搵「茄哩啡」扮住客!

條橋出自物業經紀Paul Ackerman,最近將手上一個示範單位佈置好之餘,仲搵人喺屋入面焗餅(真係整餅架)、睇波、

喺書房做嘢……

甚至安排女子喺浴室浸泡泡浴……(個女仔真係要浸幾粒鐘!)

經紀Paul話,佢有呢個諗法好幾個月,終於搵到個盤可以俾佢咁試,認為唔少客買樓前點都會睇咗樓先「扑鎚」,有演員喺屋入面活動,會令買家對未來生活更有想像。搞壇咁嘅大龍鳳,Paul都承認好多工夫要準備,不過成件事好好玩,應該有下次。   其實條橋幾好,用焗餅香味、睇波傾偈聲呢啲非文字元素吸引買家注意,而且呢類視覺以外感受先最入腦。睇過樓都知,買家一日睇n個盤,睇到第3間打後,基本上都唔記得間屋有咩特色喇,搵人做場戲,睇完樓都起碼記得係「有人浸泡泡浴嗰間」。   但係喺香港唔work架啦……個單位住2個人都「屈質」,你仲擺班人入去,咪更覺地方唔見使!去片!【相關搜尋】地產代理無底戰士