特朗普長子夠gimmick

特朗普長子因不滿《時代》雜誌選出16歲環保少女Greta當年度人物而不選香港示威者，而在網上炮轟。

小特朗普認為，環保少女只是夠gimmick，但《時代》反而放棄了付出生命的「香港示威者」。

小特朗普現年41歲，為特朗普與第一任妻子所生，目前估計身家達2500萬美元。

早幾年他最出名的，應該是涉嫌為了取得爸爸對手希拉里的黑材料而「通俄」，觸發可能干預美國大選的指控。而爸爸當然同阿仔「割席」，話自己完全唔知情，只信個仔：

“My son is a high-quality person and I applaud his transparency.”

其實，今次小特朗普炮轟Greta，就相當夠gimmick；成日話特朗普個女好叻、細仔好靚仔，早已經好多人唔記得咗小特朗普，今次有望一鋪反彈？

小特朗普能力同性格同特朗普好似，讀財務與房地產學位出身的他，平日鍾意玩下車仔（因收藏了一輛1972 red Toyota Land Cruiser而廣獲報道），又鍾意狩獵，鍾意買屋，有傳媒報道他在漢普頓為女友買了一座別墅，別墅9200呎、有3.9畝地，室內有7間睡房，11間浴室，主人睡房設有私人花園，據報還有個25畝大池塘。

可能是長子吧，小特朗普一直活在父親的陰影下，但都算好有自己想法，以前接受訪問時，一直強調想走看己嘅路，儘量避免用「特朗普」出風頭。

特朗普做《飛黃騰達》時，就係小特朗普幫爸爸做幕後顧問出謀獻策。

雖然，兩父子聚少離多，小特朗普由外祖父母照顧帶大，而特朗普同老婆離婚後，幾個仔女又一齊去寄宿學校讀書。不過關係算好，小特朗普到2001年學成返回紐約先幫爸爸手，加入特朗普集團，現任執行副總裁，已經係The Trump Organization嘅掌舵人之一。

如今小特朗普發聲，唔知對爸爸競選炒熱議題，再次強調傳媒fake news，有無正面作用呢？

不過牌面睇，特朗普𡃶個女多過長子，個女Ivanka trump身家比小特朗普高出一截，所謂「識搵錢就係好兒子」，看來小特朗普要加把勁了，過去經驗同我哋講，外國企業好多長子都要自力更生，長子唔一定最終繼承到家族企業。畢竟現代管理，就算你爸爸是李嘉誠，都要有實力先接到班呢。

===============

精選資訊網站「中環街市」 臉書粉絲頁