【熱話】港人北上的變化

最近比較多人討論嘅,除咗講移民,仲有內地宣佈港澳台居民9月起可以申領內地居住證,講到呢項新政,好似香港人終於享有「自己人」福利咁。

喺內地買車上牌都要居住證,如果你長期於內地工作,有居住證係方便,之不過,今時今日香港人,到底鍾唔鍾意北上呢?筆者從身邊朋友歸納所得,覺得愈來愈兩極化,有朋友連回鄉證都堅持唔申請,覺得大陸乜都假,更加唔會濕腳過河;有朋友就愈來愈鍾意北上,而且從佢哋身上,睇得出唔少變化。

以前北上,係貪平,抵玩,百幾蚊做皇帝,覺得內地落後,而家佢哋北上,就算人仔跌咁多都係貴,但照去點解?而家佢哋覺得上面先進,好多嘢食,好多新品牌,好多嘢玩,值得試試,睇戲仲話要睇普通話版﹗真係風水輪流轉。

如果你同佢哋講,其實銅鑼灣都開咗唔少新店啊,海底撈都嚟咗香港油麻啦,國際都會乜都有……佢哋就會話你井底,話海底撈只係連鎖店,而家都Out,再問你有無去過桂滿隴、外婆家,有無食過農家菜云云。

其實,外婆家都係連鎖店,筆者上年經過杭州時都食咗幾次,感覺嘛嘛,只嘆香港租貴,好難做呢類餐廳。

筆者WhatsApp group入面,向來有位「本土派」朋友,最近傳了一則假疫苗的新聞出來,另一位做銀行嘅財經界朋友,直接回應咗兩粒字:「港燦。」

以前是只有別人稱呼香港人做港燦的,自己人覺得是港燦,筆者還是頭一次見。

經濟易解,心結難解,可能是香港人今天開始覺得自己是港燦吧,所以,內地一切事物都是新鮮的。其實這問題很嚴重,一方面會有人盲目崇中,另一方面,自然會有人盲目反對,覺得內地人無嘢好學,什麼電子支付,香港人也不需要云云。

慢慢覺得自己是「港燦」的這份心情⋯⋯你會不會也曾經設想過?

【相關搜尋】申領內地居住證手續

===============

財經精選資訊網站「中環街市」 臉書粉絲頁