淘寶有呢啲!代客試食連報告 「保證身臨其境」

 

我曾經懷疑,一樣物件喺淘寶搵唔到的話,都應該喺個世界上絕咗跡。   估唔到淘寶可以淘呢啲,簡直超出我嘅想像,失覺晒。   呢樣唔係貨物,而係服務。代客泊車聽得多,原來「代客吃喝」都係一門財路。   呢個服務就係,你俾錢人地代你食/飲,對方會回一個報告,加埋360度無死角拍攝照片。根據提供者介紹,話係代用戶承擔高血糖高血脂高血壓風險喎,仲保證「讓你身臨其境,猶如自己在吃」。

所以係要俾錢的,以「代飲奶茶」為例,代飲加報告連埋相,盛惠人仔5蚊,飲品費另計。

你以為冇人幫襯?直情有市場競爭添呀。有店家話自己一個報告收貴人地3蚊係「我喝得比他香」。就連大學商業研究學者都話代吃喝服務「潛力好大」!   有傳媒訪問呢類「代喝妹妹」,問到顧客買呢個服務有咩好處,佢就答「可以得到快樂」,而且自己成日買飲品開銷大,呢種服務幫佢慳錢同埋用才華賺錢。   喺呢個用社交平台建立人生嘅年代,影唔到相嘅生活片段,即係唔存在嘅。個個都想試完新嘢講俾人知,不過唔通真係一有新餐廳新飲品就仆出去試,再出post呃like咩。呢種服務幫人慳時間慳腳骨力,諗落真係有得做。原文傳送門