《殺手》龔嘉欣演癲喪女殺手獲大讚 今年轉演反派有利爭視后？

無綫重頭劇《殺手》喺今個星期一已經開始播出，題材新鮮加上演員陣容鼎盛，有黎耀祥、陳豪、李佳芯、龔嘉欣，高海寧及江美儀等人主演，真係夠晒吸引力。最新一集就講到喬星（陳豪飾）去咗台灣搵匿藏嘅目標人物，喺得到錢向茜（李佳芯飾）嘅幫助下完成任務。另一方面，「Dark Angel」易蘭（龔嘉欣飾）與方太簽約，成為其旗下殺手，方太仲吩咐閻武（黎耀祥飾）照顧佢。劇集已經播出咗4集，唔少角色都容易令人留下深刻印象，當中搶眼嘅一定係飾演女殺手易蘭嘅龔嘉欣。

龔嘉欣一向形象斯文柔弱，今次喺劇中飾演一位身手了得、性格變態嘅癲喪女殺手「Dark Angel」易蘭，除咗要以Punk味十足嘅突出造型演出之外，佢仲被要求剷青。龔嘉欣喺劇中有大量打戲，很多場面佢都選擇親身上陣，就算吊威也搞到成身傷晒，甚至打到斷手指筋及尾指彎曲變形，龔嘉欣都冇驚過，搏到盡演出。唔少網民睇過龔嘉欣嘅演出後，紛紛大讚佢好犀利又搶戲、有望爭視后寶座，又索又好打及好欣賞佢等等。既然龔嘉欣演技獲得咁多人支持，相信嘉欣都會覺得之前嘅努力係值得嘅。

龔嘉欣喺16歲就開始為雜誌擔任硬照模特兒，喺08年參演無綫劇《盛裝舞步愛作戰》正式入行，之後參與唔少劇集拍攝，不過都係飾演妹妹及少女角色居多，例如《我的如意狼君》、《誰家灶頭無煙火》、《拳王》、《守業者》及《張保仔》等等。近年佢嘅戲路越嚟越廣，16年可以話係佢演藝事業嘅高潮，憑《幕後玩家》飾演賢妻良母程思汝一角，演技獲得大眾認同，更成功奪得「最佳女配角」。佢喺今年年頭播出嘅《大醬園》飾演為上位不擇手段嘅大反派葉細么，演出亮眼，同樣備受網民讚賞。