【扮工收風】酒店業歡迎退休人士「入行」

你以為只係保安及屋苑看更大幅聘請退休人士入行?咁就錯喇,估唔到依家生意不景嘅酒店業都寫到明,歡迎退休人士申請相關職位。網民睇到呢個招聘,第一個反應都係「依家呢個時勢仲請人?仲要請退休士?」

招聘廣告寫到明,酒店請緊前堂部客戶服務、代客泊車、餐飲部主任侍應、主管、賓客服務部保安主任、房務部清潔、工程部技工等,福利仲唔錯,有年假花紅、當值膳食、清晨夜班交通津貼、醫療牙醫福利同埋購物優惠。而最搶眼嘅一句,就係「歡迎退休人士申請」。

聽行內人講,雖然依家經濟係唔好,但好多厭惡職位,其實都冇咩後生仔肯做,就好似清潔房間、房務部呢類,更加係重災區,所以冇辦法,唯有向退休人士埋手。

同埋有行內人話,經濟唔好,酒店booking相對少咗,但唔代表食白果、無生意,其實好多酒店只要肯做吓啲優惠,都仲有好多人會幫襯,所以好似執房呢類前線人手長期都好渴市。

咁都好,知道退休人士又多條後路,都算得上係一件好事來。

===================

19網輕鬆爆料熱線,歡迎舉報老細同事19惡行,立即click入去講畀我哋知啦