【扮工收風】有公營機構上司「割蓆」

卸膊係人之常情,喺呢個咁險惡嘅世界,辛苦咗十幾年先有個中上層位,平日望著個海景,對份工真係幾唔捨得,如果無兩招傍身,份工又點做到落去?

之不過,卸膊呢樣嘢,感覺好似公營機構特別多,唔係講尋晚電視警隊「一哥」,而係小編聽聞有公營機構嘅marketing部門,最近被internal audit揭發,懷疑呢個部門採購服務時「出術」,而令到某公司不斷贏得大大小小合約,涉及金額絕對唔細。

最頂癮係internal audit發現後,叫涉事部門主管同同事開會了解事件,主管竟然開口一句就「割蓆」,講到「其實前線點做procurement呢啲咁細嘅事,我管唔到㗎喎。」

呢句說話令到旁邊下屬反晒白眼,心裏咒罵「明明每一步都問過你!」internal audit嘅同事都忍唔住串咗句「相信你份糧包管理」。

之但係喺公營機構,卸膊真係有用,主管因爲呢一句,卸晒俾前線,佢自己成功過到骨。

所以話,職場生存之道,四個字,厚顏無恥。

===================

19網輕鬆爆料熱線,歡迎舉報老細同事19惡行,立即click入去講畀我哋知啦