Yahoo 行動版

21人追蹤

怒減550磅 神級瘦身王減肥貼士︰唔使節食

新一年有幾多人今年嘅願望係減肥?

《英國衛報》訪問咗好多位健身教練,人人有唔同故事。

其中一位就犀利咯,50歲嘅Graham Waugh曾經重330公斤(727磅)!

重到離開唔到屋企,只有等死;

之後Graham做咗束胃手術,而且開始去gym做運動。

到佢減走原本3分2嘅體重,即係得返110公斤(242磅)嗰陣,

Gym嘅老闆問佢「不如你嚟做教練啦」。

起初Graham以為係講笑,覺得自己又老又肥,但係回心一諗,

佢嘅經歷正正幫到同路人,甚至可以透過運動減肥,手術都唔使做。

健身教練唔一定要大大隻隻,英國工黨前領袖、52歲嘅Tom Watson,

宣布退出政壇之後,以運動及飲食減走51公斤(112磅),甚至連糖尿病都俾佢KO埋。

而化妝師Alma因為情緒問題,一唔開心就食嘢,

加上陷入一段唔好嘅關係,令佢變本加厲,一年重咗成90磅。

Alma無意中喺網上見到營養師嘅資料,於是約咗見面,

對方叫佢影一張相,只係著住內衣褲,Alma睇完先知自己原來體重失控。

透過改善飲食,體重有改善,之後再去做gym,直情有埋自信心,

因為舉鐵可以令佢知道自己係得嘅!

Alma直情決定轉行,考個教練牌,而體重就由350磅怒減至176磅。

幾位減肥達人又有咩貼士俾各位都想減肥嘅朋友?

Graham話唔好諗住要減幾多,只要每日盡力做最好嘅選擇就得,

而且一時口痕食咗邪惡食物都唔緊要,下餐食返正常就ok。

Alma就話諗清楚點解要減磅,咁你就會有動力做運動,

而運動唔一定要去gym先做得,散個步其實都好夠,最緊要持之以恆!

原文傳送門