雅虎香港新聞 #年尾回帶系列 十大熱搜網路紅人係……
12月，係回顧嘅旺季。公司埋數、考試溫書、 新聞大事回顧，全部要你望返轉頭。以往有傳媒會搞投選年度新聞人物，不過大數據更誠實，睇吓10個最多人喺Yahoo search嘅網路紅人係邊啲先～【相關搜尋】YAHOO搜尋人氣大獎2018 政府類今年最多人search嘅網路紅人，係消防處為推廣「任何人都可以救人」訊息而創作嘅代言人「任何仁」。由於造型不可思議，又似AV嘅透明人，旋即引起討論，以效果計，相當成功。
另一個上榜單位，係食環署「旗下」嘅清潔龍阿德。阿德背後嘅團隊可謂全年無休，就熱門話題抽水嘅反應快，又食住外國TRAP音樂風潮整咗首一啲都唔老土嘅宣傳歌《我今天出了一首TRAP MUSIC 叫做我叫做KEEP CLEAN AMBASSADOR》，仲上埋Clockenflap音樂節，令阿德打入網紅榜第9位。
任何仁同清潔龍阿德就好似歌手爭獎咁，年尾先發功搏樂迷記得。 「神」人類龍心同劉馬車，2位「神」人蟄伏多時， 前者話因為被「山竹」呢個颱風吹醒咗； 另一個就盛傳因為官非而被內地扣留，到今年9月尾先獲釋。 今年巧合地一齊復出，難怪會分別殺上亞軍同第5位。 話說「神」人界好似除咗佢2個之外就冇其他代表，下年會唔會有後浪？定係……香港人精神咗？
TVB類大台冇人睇？咁點解工藤佑采呢位黑面港姐，又會咁多人留意，仲成為年度季軍？ 又，咁點解汪阿姐寫字tag人嘅「汪阿tag」風格，咁多人跟？仲要力壓Captain Nancy成為第4位，大台嘅人真係冇人理？ 所以我喺開頭咪話「大數據更誠實」囉。唔理嘅，你又search？
美女類網紅點可以冇美女？今年2位代表……唔，靚得好另類。 10月，一位被指同餐廳串通、喺網上約食飯賺取「交友費」嘅女生Karen，上咗報紙A版。昆人上去食飯呢條橋當然神奇，更驚訝嘅係……真人同相嘅落差大到，你要讚頌修圖app嘅偉大！ 另一位就光明正大得多，Youtuber Catgirl其實出道兩三年，講飲食旅遊青吓開箱報告，面對負評態度豁達，証明好多人睇到佢嘅內在美架。
動漫類喺「宣傳易」出現多年嘅好拍檔「會計妹」同「創業龍」，其實一直都係香港「動漫」界另類小眾口味，今年之所以彈起，我覺得喺8月動漫節cosplay扮會計妹嘅coser應計一功！ 既然鬥成本鬥心機唔夠日本美國鬥，粗糙都係另一種殺著！
