#年尾回帶系列 十大熱搜網路潮語係……

19+

尋日數完網紅，今日數潮語。嗱，正所謂「明就明，唔明就黎明」，要上Yahoo Search一個潮語，即係唔明出處唔明點解啦？所以呢個榜亦可以稱為「十大最摸不著頭腦嘅網路潮語」。【相關搜尋】YAHOO搜尋人氣大獎2018   潮片潮圖類今年最多人search嘅，係呢句「係愛呀，定係責任？」。源於一條攝於今年6月嘅網上短片，一位地盤大哥被問到「年青人，究竟有咩動力，驅使你喺呢個暴雨下工作呀？係愛呀？定係責任？」，佢就答「係窮呀！＿你個＿！」。

「係愛呀，定係責任？」可以話係人生交叉點萬能key，買樓、結婚、轉工、返屋企食飯……有邊樣唔係基於愛或者責任？咁有同感，所以潮囉。   第2位，就係「佛系」呢個term。其實幾年前日本有雜誌介紹過「佛系男」，即係會對生活有執著，但係對異性又冇咩辦法嘅男性。講下講下，演變成「隨遇而安，不拘小節」嘅生活態度，再加埋呢張圖，就成為人人share人人講嘅潮語。

第5位潮語「係愛呀，哈利」，都係出自潮圖。本來係《哈利波特》電影系列嘅一張cap圖，由於太好用，講講吓潮咗，只不過……點解今年先打上十大？

緊隨其後，第6位嘅「精神」，相信係源於n年前一位少年出post，話「同我大佬影相，係精神嘅。今日大佬仲畀咗廿蚊我食飯，話我跟咗佢咁耐都無畀錢我袋，爽，今日唱k我嘅!」。點解同大佬影相會衍生出用「係精神嘅」嚟形容，真係打破一般人對語言嘅認知。而且，百物騰貴嘅年代，收20蚊就咁開心，真係……「係愛呀，哈利」！。

內地潮語類   向來內地用字點都會流入香港，好似N年前嘅「打的」，近年啲嘅「小三」，都成為我地嘅日常用語。   內地節目《中國新說唱》（前稱《中國有嘻哈》），向來都會喺節目入面製造潮語，加強宣傳聲勢。上年嗰句係「你有freestyle嗎」，今年係「skr」，都係出自導師之一嘅吳亦凡口中。Skr本來常見於外國rap詞入面，喺節目入面被演繹成有型、酷咁上下意思。Skr呢個字，成為今年熱搜潮語第3位。

第9位潮語「666」，用國語讀音調似「牛牛牛」，又係好型咁解。

下年又會有咩內地潮語打入十大？咁真係要睇《中國新說唱》班底想chok個咩字出來。   日常生活類第4、7同10位嘅「啱呀」、「chill」同「真心咩」，其實係時下年青人口頭禪。多人search可能係佢地父母老師真係唔知點解。

手遊PUBG大熱，打贏一局有得「食雞」，令呢個term登上第8位。亦可能因為太多人冇打機以為「食雞」真係「食雞」咁解。