大富人家請攝影師影旅行照 年薪79萬

耐不耐就有啲「世紀筍工」出現，幫藥廠試藥啦（呢個都叫有健康風險）、做旅遊勝地嘅代言人（其實當廣告費咁計，宣傳效果好，都幾本小利大）。   另一種人工高嘅「筍工」，係幫有錢人打工。司機、管家、廚師、保鑣，諸如此類。不過人工高自然要求高，又要隨傳隨到，有辣有唔辣啦。   英國有攝影網站就收到一份招聘廣告，係一個有錢人家想搵家庭攝影師。工作……就梗係影相啦。

喺send俾呢個網站嘅email入面，呢家人本來有個家庭攝影師，但係做到2月就唔做。原因唔多唔少同工作性質有關－因為份工要跟呢家人周遊列國，隨時要行開3個月，陪呢家人去馬爾代夫潛水、巴西嘉年華、摩納哥睇F1賽車……   有冇興趣？咁我地講下條件︰5年生活攝影經驗，仲要做背景審查，最後再俾成個周末同呢家人見工。   待遇又點？每日工作10小時、30日大假、有薪病假，出trip機票飲食住宿老細包晒。人工呢？年薪8萬英鎊，大約港幣79萬，平均6萬幾一個月。   我諗最值錢係過完一年豪華生活之後，見盡有錢人秘辛，再搵題材出本書賺嗰浸。Crazy Rich Asian有幾收得，唔駛講啦啩。原文傳送門【相關搜尋】 瘋狂亞洲富豪真人版