國產網紅派有料餅乾玩流浪漢 隨時要坐監
做youtuber,競爭仲大過做藝人。以前就話要攝位出招搏上鏡,而家要喺成個youtube度爭收視,啲招數自然要夠狠。
西班牙巴塞隆拿一位來自中國嘅少年youtuber ReSet,個channel有120萬人follow。佢嘅片多數都係玩吓大整蠱,呢次佢就將牙膏唧入夾心餅乾,然後派俾流浪漢。食咗呢件「有料」餅乾嘅52歲男子佐治,事後話好唔舒服,嘔足5分鐘。
但係ReSet喺條片度話「我幫佢刷牙啫」。
條片出街之後負評多多,ReSet仲去搵多次佐治,想去「陪」人過一晚,其實就係想俾300蚊歐羅(約3170港元)掩口費。
而家ReSet就俾巴塞隆拿當局以「有違道德誠信」控告,隨時要賠3萬歐羅(約31萬7千港元)俾佐治,以及2年監禁。喺法庭上,律師指ReSet因為呢條片,賺到2千歐羅(約2萬1千港元)廣告費;而佢唔係第一次做呢類「加料」惡作劇,試過將貓糞混入三文治派俾小朋友同老人家食……而家Youtube已經封鎖咗佢個channel。
告得入的話,只可以講句「罪有應得」。
19+精選推介
秒like 19+ Facebook!