哈爾濱禁產銷冥通 憂貿易戰打到去陰間

貿易戰愈演愈烈，最新一波，竟然打到去陰間﹗話說近月哈爾濱市雷厲風行，嚴查產銷冥通，無論係生產企業、紙製品小作坊，抑或各類集貿市場、醫院及殯葬場館周邊，都明確規定「禁止任何單位和個人生產、經營冥幣和紙人、紙馬等迷信殯葬用品。」 據了解，今次政府仲封殺埋生產同加工冥紙冥幣等「封建祭祀用品」一環，包括紙人、紙馬（牛）等紮糊用品，一經發現，一律沒收，堅決取締和查處。 據報導，哈爾濱今年3月下旬開始執法，至今出動城管1.2萬餘人次，清理取締佔道販賣冥紙冥幣、店外販賣冥紙冥幣攤點800處。 但係點解會唔畀燒衣呢？根據報道，當地政府以封建迷信以及環保為理由。過往萬人空巷嘅燒衣習俗污染環境，同埋接獲舉報有非法造紙廠「印銀紙」，令廠區附近山區，有霧霾現象。 再加上燒衣被當局定為「浪費」。 以現時哈爾濱每年6000噸燒紙計算，每噸約2000蚊，燒紙價值就相當於1200萬人仔，加埋紙紮樓、豪華汽車等，一年就隨時燒去一億，所以當局才有意取締。

就當地政府唔畀「地府」印銀紙，引起內地人非常不滿，除了揶揄「連陰間外匯額度都管」、「憂慮貿易戰打到去陰間了」、「是人民幣貶值的原因嗎」、「減少貨幣供應壓抑通脹」等之外，還認為一刀切政策，與中國人習俗相違背。

不過大家留意，打擊冥通流量，原來各大省市同樣以環保為名，都陸續有不同程度嘅「辣招」⋯⋯其實，殯儀業電子化經已係大趨勢，wechat俾帛金一早已經唔係新聞，話唔定好快就有虛擬燒衣，手機開個app，就可以打齋；用微信搖一搖，就可以鞠躬，慎終追遠。

來源：中國新聞網

【相關搜尋】陰間通脹燒人仔

===============

財經精選資訊網站「中環街市」 臉書粉絲頁