凱匯會係維港灣翻版？

應對樓市調整，信置以驚喜價推售凱匯成功掀起搶購潮，令人想起98年同樣係信置以平價去貨的維港灣，究竟今次搶購凱匯買家會否步當年維港灣一手業主後塵呢？ 當年信置推售維港灣時，香港剛受到亞洲金融風暴衝擊，經濟氣候較現在差得多。不過信置以平價策略推盤，仍成功錄得五十倍超額認購。除了得力於當年還有人嘗試炒籌，亦因為有不少用家相信最壞的時間已經過去。可惜事與願違，之後科網爆破，更大鑊係2003年沙士，令香港步入黃子華形容「有份工打唔好咁招遙」的絕境，令當年一手上車的用家難逃成為樓蟹惡運。 但話分兩頭，從過去十年維港灣有不少大賺成交，你會發現賣家正是一手購入死守長揸，證明這類贏在位置的樓盤確實可以吸引一些持貨能力超強的用家入手。雖然今次凱匯有所謂「買家」，被網民篤爆本身係物業代理，但數百人在尖東排大隊等買樓，總不會人人都是「老臨」吧。而且以位置優勢，凱匯毗連東九商業區及港鐵站，又位處觀塘市中心，唯一輸蝕予維港灣就係距離中環較遠，所以一如當年維港灣吸引具實力的用家入市亦毫不出奇。

凱匯還有一項獨特優勢，就係具備成為將軍澳業主殺出「市區」換樓目標條件。將軍澳塞車問題一年嚴重過一年，不排除將來持續會有業主頂唔順會策動賣樓轉區大計，而位處將軍澳「出口」的觀塘頗有機會成為他們的換樓熱門選擇，有了這批潛在購買力，理論上凱匯抗跌力可睇高一線。 然而一如維港灣，抗跌力有幾強亦難敵突如其來的經濟衝擊，所以過去最醒的維港灣買家唔係一手上車，而係等跌到殘才入市的一批，其中包括近期風雲人物華為掌舵人父女，其中阿爸任正非原來在2003年開始吸納維港灣物業，前後掃入18個單位。作為普通置業者，我們當然難以像任生般做跨國大生意，但他入貨眼光之準，就肯定值得參詳了。

===============

財經精選資訊網站「中環街市」 臉書粉絲頁