環保少女通貝利facebook帖文 原來係搵人代筆?

 

舊年瑞典環保少女Greta Thunberg風頭一時無兩,發動世界各地青少年星期五遊行集會,仲成為《時代》雜誌年度風雲人物。佢對住世界各國領袖講嗰句how dare you應該都係國際級年度金句。   人怕出名豬怕肥,向來有唔少人質疑Greta Thunberg係咪一個傳媒炒作現象。之前佢由德國坐火車返家鄉,po咗一張喺車廂席地而坐嘅相片,當地鐵路局亦都喺網上回應,話Greta Thunberg係「坐喺頭等車廂,同其他旅客一樣,享受了列車服務員『親切且專業』的服務」。暗示佢張相係設計圖片!   呢期澳洲山火,Greta Thunberg都有喺facebook出文提及。有網友發現,由於facebook有漏洞,用戶可以睇到一個專頁嘅帖文背後係由邊個人發布、邊個人修改。   而呢個澳洲山火post,原來係由Greta Thunberg嘅爸爸發布;另一個post,就由一個印度環保人士發出。

咁當然會惹來議論紛紛,Greta Thunberg就解釋自己舊年開始只係用facebook轉發Twitter嘅帖文,而自從佢決定唔用facebook作私人通訊工具,Greta Thunberg嘅帳戶就好似其他專頁一樣,要搵人管理。Greta Thunberg就搵自己爸爸,以及名叫Adarsh Prathap嘅印度環保人士幫手出post。至於帖文內容就係佢親自撰寫。

今次疑團解開,但係好多人仍然對溫室氣體引致氣候變化嘅講法半信半疑,新一年Greta Thunberg仍然要面對好多挑戰。原post傳送門