點解會有《逆天奇案2》?梗係第一輯收視好啦。3年前《逆天奇案》成為全年收視冠軍,小編都跌眼鏡。畢竟同一年有《刑偵日記》,有惠英紅姜皓文搭多個王浩信,放喺奧運檔本來打算谷收視,結果變成炮灰,一度成為TVB史上最差收視劇集。該年另一重頭戲《星空下的仁醫》有齊醫生劇+馬國明兩大收視賣點,又有鍾嘉欣周嘉怡回巢助陣,劇本流暢唔難睇,反應居然平平。《逆天奇案》拍好一年幾先街,出人意表地成為當年之冠,可能因為《逆》係主角陳展鵬相隔三年先有嘅新劇。