拒絕做社畜!日劇《我要準時下班》首播引發打工仔激烈討論

4月正值日本新年度開始,開播嘅春季日劇主題離唔開職場主題,改編自朱野帰子同名小說嘅《わたし、定時で帰ります。》)《我要準時下班》),故事圍繞一個以唔加班、準時收工為原則嘅OL,第一集播出後立即喺Twitter引發熱烈討論。

吉高由里子飾演主角東山結衣,係一個每日早5分鐘返到公司,6點準時打卡收工嘅OL,但佢冇偷懶,反而因為有「準時放工」呢個目標,做嘢更加有效率,打破過往日本人認為「加班係美德」呢個職場觀念。就連日本人放工後嘅聚會亦一律唔會參加,盡可能唔將工作有關嘅嘢帶入私生活。

結衣有呢個堅持其實係因為人生第一份工嘅影響,同其他社畜一樣每日被工作、前輩壓力搞到透唔到氣,某日工作期間從樓梯碌下而重傷,差啲冇命,好返後令佢突然覺悟:「我唔理,我要辭職,我唔想勉強自己,我要輕鬆過日子,呢個就係我嘅工作方式。」

之後結衣開始搵工,見工時都會講佢要求係準時收工,面試咗100間公司先遇到知音人,社長聽完笑住回應:「唔好淨係為公司賣命,要享受人生,識多啲人,拓展自己世界,累積呢啲經驗先至可以做好份工。」可惜隨住新部長同埋副部長調派到結衣嘅部門,結衣「準時放工」嘅工作態度立即令部長不滿…唔劇透太多,作為打工仔一定好有興趣睇!

好多網民亦對日本人「慣性OT」呢個惡習有好多意見:「呢部日劇點出現代社會4個問題,一係上司強制下屬體驗同佢過去做新人時一樣嘅經驗、二係長時間工作=勤力,三係準時放工=偷懶,四係強制加班,全部都係日本必須改變嘅地方」、「日本人對遲到好嚴格,但對放工時間就好寬鬆」、「我同女主角一樣,有咩唔啱?點解我要幫嗰啲掛住煲煙hea做嘅人,加班幾十個鐘每個月都係得幾千日圓加班費!」

圖片來源:日劇わたし、定時で帰ります截圖