孤單原來都係壓力來源 靠社交可有效解決問題？

現代醫學已證實，壓力係會對人身體構成好多健康問題，例如癌症、心臟病、心血病等等。壓力可以話健康剋星，大部分可能覺得壓力來源多數來自其他人，例如工作、家庭、伴侶，原來大家都忽視咗壓力其中一個重大來源，係孤獨感。

根據「美國心理學協會」（American Psychological Association）嘅研究顯示，孤獨感係會令人嘅血壓升高、免疫力降低、認知減低等。即係話被稱為脫離社會嘅「孤狼」，其實因為欠缺社交，會導致身體壓力水平上升，簡單影響個人健康。不過實際上超過7成人唔知道社交係有效減壓嘅方法，大家都唔意識到孤獨係令自己壓力大增嘅原因。「美國心理學協會」就建議，其實唔需要將自己變成一個Soical精，只需要簡單幾個方式、幾個朋友，就足以有效減少壓力。

提升社交能力

知道好多人都有少少怕同人Social，其實唔需要刻意把自己變成「開籠雀」，同唔熟嘅人對話由簡單問題開始，盡量搵共同話題；舉例同同事的話，可以由公司活動開始講起，大家都有參與嘅情況下，大家都會有嘢講。總之，唔需要太緊張，亦唔好太在意自己形象，放膽去講吧。

興趣最重要

每個人都有興趣，就向自己興趣開始建立一個關係網；例如鍾意行山嘅，就可以喺山上多啲同山友溝通交流；喜歡煮食嘅喺網上煮食論壇多認識網友等。順從自己興趣，可以確保雙方都有共同話題，而且自己都會感到舒適安全，唔需要改變自己遷就他人。

尋求同輩認同

唔同團體入面可能都會遭遇唔開心，要尋找合適對話對象，最好係同輩；於公司之中就搵自己同級同事；家庭之中就搵同輩兄弟姊妹。同輩之所以係最好，因為同理心最強，可以更體諒自己，同時間必須係自己信任嘅對象，咁先可以暢所欲言。

主動權從來都係你自己

最後，必須要提醒你，只有你自己主動出手先可以幫到自己。好多孤獨嘅人覺得係世界、朋友離棄你，其實更多嘅人係因為自己唔主動。唔好永遠希望由人哋向你伸出手，你自己必須付出努力、時間。友情係需要時間經營，投入幾多，得到幾多，大家必須衡量呢。

資料內源：美國心理學協會