前度係世上最討厭物種!教你4招優雅擊退男友前女友

對於現任女友來講,最可怕又具威脅性嘅人一定係男友嘅前度!如果畀你知道男友同ex夾份買樓,你會唔會癲咗?

日前有連登巴打以「【道德淪亡】打算同ex一齊買樓」為題出post,表示有意同拍咗十幾年拖、好似屋企人咁親嘅富貴前女友一齊夾錢買樓投資,但諗深一層又擔心現任介意,於是問下一眾網民意見。

香港係全球最難買樓上車嘅地方,唔少網民直言會接受offer:「為你嘅將來打算,就算現任飛你,你都有層樓揸手,到時想玩都得啦」、「呢個世代,信愛不如信金錢」、「唔好畀條女知佢係ex咪得」…

不過亦有網民認為瞞住現任同ex一齊買樓唔work:「照直講,你都呃唔到現任一世」、「有現任就唔好同個ex有聯絡,一係搵個現任可以接受到」,更加有網民表示會因為自尊,斷言拒絕offer咁話!

無論係出於冇安全感定係呻醋,男友前度點都係乞人憎架喇。如果你男友同ex「再見亦是朋友」保持友好關係,更加令現任不安。如果前女友想同男友重拾舊好點算好?即刻教你4招擊退前度!

1.保持大方

男人對於愛情向來比女人較遲鈍,又唔了解女人心情,如果你一開始就發嬲要男友同ex斷絕聯絡,反而會覺得係你小氣。作為一個體貼嘅現任女友,最好保持大方,表明唔介意佢哋有聯絡,令男友覺得你係一個穩重女生,總好過男友怕你嬲而暪住你但又繼續同ex聯絡。

2.與敵人做「朋友」

與其同男友ex敵對,不如做朋友啦,同你男友講想更深入認識呢位朋友,不如約一次飯局,觀察佢哋究竟係「真朋友」定「假朋友」,加上兩人好多時係有共同朋友圈,冇理由要男友因為前度而冇咗班老死,所以最好就係融入男友朋友圈子,做個跟得女友。

3.切忌經常提起

現任女友總係對前度太好奇,經常不自覺問起男友關於前度嘅事同埋經歷,呢個喺一段關係嘅大忌,本身男友明明都唔係好記得,反而你成日講,令佢勾返起以前嘅甜蜜回憶,分分鐘會覺得你唔及前度好!而且,有啲嘢知得多都唔係好事,無謂令自己唔開心啦。

4.表明自己對前度嘅態度

既然你唔想另一半與ex有聯絡,咁你自己呢?如果冇,就可以利用呢點向男友表明係因為顧及佢嘅感受而唔與ex聯絡,令佢重新反思與前度嘅關係,勾起佢對你嘅內疚感。

圖片來源:電影"前度"截圖