【寧可信其有】七月鬼門關大開 情侶禁忌

今日就係七月十四鬼節;相信好多禁忌大家都知,唔須要多提,不過作為現代人,未必個個都咁留意,好多上一輩嘅人話今晚要早啲返屋企,但年輕人可能連今日係七月十四都唔知!今日為大家講下情侶間,喺鬼月期間,有咩禁忌唔好做啦。當然,一切都係寧可信其有,並非鼓吹迷信呢。

切勿去幽暗地方談情

靈體都愛藏於幽暗僻靜嘅地方,平日有啲情侶可能鍾意人少少去公園、街角等地方談情,但七月最好就避免喇;尤其係靈體多數依牆而居,如果貼住牆玩壁咚,就更加危險。

勿呼喚對方名字

好多情侶糖痴豆,Sweet少陣都唔得;但七月期間就唔好亂叫對方個名,特別係空曠地方,據聞會吸引靈體前來,並於一直跟住你。

勿拖手前往拜祭或墳場

正常去墳場或墓地拜祭係無問題,不過情侶要避忌一下,七月如果真係要去呢啲地方拜祭的話,唔好拖手或做出任何親切行為,易引起單身靈體妒忌。

勿於家中睇鬼片

情侶當然其中一大活動係於家中睇下電影、Netflix;尤其鬼節特別多鬼片推介;但鬼節期間情侶盡量避免喺屋企睇鬼片;因為好多靈體會被吸引前來,易請難送呀。

最後,最強調一次,鬼神之說皆為迷信,大家只求心安就可以,未必需要盡信呢!