雅虎香港新聞 【樓市贏家】凱滙收得 平唔係一切（徐峰）
近幾個月樓市淡靜，多個新盤齊齊撻Q，但近排信和推出的觀塘凱滙可謂淡市奇葩，一個星期不足收六千幾七千飛，雖然實際賣到多少就要明天才有消息，但估計總不會只有一百幾十間，到底凱滙有何原因成為市場焦點？
第一，當然是價錢平，雖然根據過往經驗，很多時市建局有份的樓盤，可能因為地點多數都位於市區靚位，價錢都食到幾盡，不過，不知道是否信和或者市建局都深明一個道理，在淡市下賣樓，加上整個盤有成2000個單位，開爛個頭非常麻煩，寧願首批平少少壯下聲勢，好過開得貴但賣得少少，後面千幾個單位賣一世都賣唔完，所以今次凱滙頭三批488個單位，平均折實呎價都只是17000多元。
17000多元一呎即是有多平？睇睇近幾個月推出的新盤，馬鞍山泓碧首批16497元、青龍頭逸璟‧龍灣首批近1.5萬元、屯門菁雋首批16937元、屯門弦海首批15791元，對比較來，九龍區比起新界區都只是貴千幾二千蚊一呎，你覺得是否抵買先。
第二，位置上，凱滙雖然位於觀塘舊區，不似啟德一樣，整個區域都是全新打造，但勝在行幾分鐘就到已經開通幾十年的港鐵站，不用怕新港鐵線又推遲唔知幾多年才可以啟用，又不用等甚麼擬建、規劃中的機建，加上觀塘除了有新地的創紀王國令該區由工廈區變身商業區之外，凱滙所在的裕民坊重建區本身已經是市建局有史以來最大的市區重建項目，未來仍會有大型商場、酒店、寫字樓，除了無海景之外，位置上一點都不輸蝕。
第三，No news is good news，特別是近年啲樓盤特別多「騎呢位」，傳媒或網民都會取笑一番，例如龍床盤，雖然市場上好有焦點，但就是太矚目的關係，人人都知個盤有幾差，而凱滙呢？整體來說就是一個四平八穩的樓盤，一房面積450呎起，相當有人性，又無臭河、電塔等俾班傳媒大寫特寫，所以推出以來全部新盤都好正面，自然唔會惹人反感啦！
不過呢，這個又不是全無弱點的，講真，一房面積雖然好有人性，但都要700幾萬起步，門欖又真係比較高了一點，再加上隔離一期的重建項目，到依家樓都未拆，落成之時相信都有段時間要食塵。
=============================================
