雅虎香港新聞 斷捨離點止執屋咁簡單？原來仲可抗抑鬱、減浪費
日本人近藤麻理惠今年初喺Netflix嘅節目令人有執屋並掉嘢嘅衝動，但其實「斷捨離」已出現一段時間，仲唔止執屋咁簡單。呢個詞係由日本作家山下英子於2000年首先提出嘅概念，係一種生活態度，提倡斷絕多餘、唔需要嘅事物，脫離對物品嘅執著；呢種極簡主義提倡人透過收拾屋企，將當下覺得唔需要嘅物品捨棄，只留低最需要、最鍾意嘅事物。至今「斷捨離」熱潮未減，究竟以此為生活宗旨嘅人，點解有咁嘅堅持？
57歲大學前講師斷捨離：無乜嘢但好快樂
近日有新聞節目就以「斷捨離」為主題，更形容係「心靈大掃除」，當事人嘅心聲或可令大家了解呢種生活態度多啲。其中一位係周華山，57歲，曾經喺大學教書，亦曾經崇尚物質生活；26歲已喺大學就職嘅佢，30歲時就儲咗人生第一個100萬，舊時嘅佢喜歡買西裝、名錶等奢侈品嚟炫耀。直到1998年佢做學術研究時去雲南山區，同當地人接觸先感到即使物質匱乏嘅地方，但佢地反而比港人更快樂，果度無人自殺，亦冇乜人有精神病問題，令佢感到衝擊，先知道人需要嘅其實好少。而佢一住雲南就係5年。
回港嘅周華山大大改變生活態度。佢後來無再響大學返工，轉而創立非牟利團體，主要做心靈健康；佢係做全職義工，所住嘅200多呎單位做逆按揭，加埋積蓄維生，每月只花2000多元。佢嘅屋企好簡潔，清晒唔需要嘅嘢，除廚房、廁所外，就係一床、一枱、一椅、沙發、電腦，加櫃子。佢享受「一眼睇晒」同簡單嘅生活，直言「無乜嘢但好快樂」。佢極少做消費，衣服大多著10年以上，興趣唔係行街睇戲，而係游水行山。
單親媽媽購物狂變斷捨離：只想留幸福嘅嘢喺身邊
另一位單親媽媽Mill，曾經走過人生低谷，離婚後要獨力湊兩位小朋友，並曾受抑鬱症困擾。不過，當佢離婚後決心執屋、裝修之時，竟變咗係佢嘅轉捩點。佢住嘅500幾呎單位，以往比較擠逼，因為有好多雜物如書、唔需要嘅傢俱等，佢以往係「購物狂」，不時買東買西。佢把心一橫將全屋一半嘅嘢掉左，好似唔要嘅書、衣服、雜物、廚具等等。佢話「斷捨離」令佢驟覺煥然一新，只想留幸福嘅嘢喺身邊。呢個過程，令佢回顧過去，重新為自己嘅未來舖路。佢不諱言，捨下令佢更自在、更釋放。
「斷捨離宗師」山下英子新作 主張做「統一管理」
除咗香港之外，其他地方都繼續有「斷捨離」延續。前段提過、作為「斷捨離宗師」嘅山下英子，近年都繼續有筆耕，上年就推出咗新作《家事斷捨離》。書入面佢提到，如果讀者想喺屋企輕易搵到想要嘅嘢，可預先將各項物件分類，放喺屋企某個地方做「統一管理」。佢又話可攞走儲存盒嘅蓋，令自己可以「俯瞰」檢視，一眼睇清物品位置；而盒中物件嘅數量亦要有限制，以免物件數量太多。
另外，台灣有新創團隊創立手機應用程式Swapub，意念係「斷捨離」嘅變奏。呢個程式係以「換物」為目的，想「斷捨離」嘅用家可以將唔要嘅物品，同其他用家「以物易物」，同時都係減少浪費，可謂一舉兩得。當中「可交易」嘅物品包羅萬有，包括畫具、電器、遊戲機Switch嘅遊戲帶等等。
城市生活的確好急促，掌握生活節奏，最緊要都係自己舒服，唔一定要跟某種特定生活方式，畢竟感受因人而異。不過，如果人真係選擇以「斷捨離」方式去面對一切，都可以話係一種放空，從物慾橫流之中釋放出來。
斷捨離2.0！Swapub換物APP 老物新生響應422世界地球日
相關字：
斷捨離 心靈大掃除 極簡主義 近藤麻理惠 山下英子 家事斷捨離 香港 日本 台灣
