撐警劉亦菲拍《花木蘭》 盛傳效果奇差要大執？

呢啲算唔算因果循環呢？話說內地女星劉亦菲8月中喺微博出貼「我支持香港警察，你們可以打我了」外仲加多句「What a shame for Hong Kong」。估唔到呢位美籍「仙女姐姐」，咁熱愛中國兼支持香港警隊，似乎有違佢主演嘅新片《花木蘭》，主角為家人代父從軍，犧牲小我嘅精神。結果網友發起一連串＃boycottmulan（抵制木蘭）行動。

不過再多人＃boycottmulan都無改變迪士尼選角意向，無他嘅！除咗美國本土市場，真人版搵得劉亦菲、李連杰、甄子丹主演都係為咗大陸市場，佢嘅撐警言論不知幾啱14億人口味，所以電影預告片、海報繼續如期發佈，就算你無興趣睇，都好難避免喺戲院見到將劉亦菲影到似張家輝嘅電影海報！

世事有時真係好奇妙，《花木蘭》電影雖然唔理中、港政治紛爭，不過完成品似乎強差人意。根據專爆迪士尼內幕嘅網媒「Disinsider」透露，電影日前做咗試片測水溫，結果動畫版太經典，觀眾對真人版反應冷淡，特別負評位係真人版無咗可愛嘅木須龍，由一隻唔講嘢嘅鳳凰取而代之。

其他不獲好評嘅原因，仲包括重用動畫版經典歌曲，不過主角唔再開金口唱歌，純粹用嚟做背景音樂！據聞迪士尼決定出錢開多4個月工補拍部份場景，主要係執戰爭場面。用到4個月都幾大工程，會唔會係要補返隻木須龍入去打仗所以要拍咁耐？

迪士尼近年不停翻拍自家經典動畫，由《美女與野獸》、《灰姑娘》、《獅子王》到《阿拉丁》，套套口碑票房出色，獨獨《花木蘭》出師不利，依家補拍都搞咁耐，分分鐘趕唔切下年3月上映，要將映期延後！唔少外國網友斷言如果一套電影要重拍的話，出事唔好睇嘅成數非常高！

截至現時，迪士尼仲未出面回應有關傳聞，不過可以肯定，美國熱愛《花木蘭》動畫嘅影迷為數甚多。由電影確定開拍至今，對於真人版電影嘅細節非常關注，所有同動畫版有出入嘅改動都唔多接受到，香港可能因為劉亦菲言論流失部份觀眾，而美國可能因為無咗木須龍而少咗入場意慾，內地票房亦有隱憂，因為敏感嘅觀眾成日話外國出品辱華！

就算美國觀眾唔受撐警言論影響，電影版《花木蘭》似乎都多災多難。