林超英：買樓要向南偏東

香港人生活空間狹窄，不少人夢想有座擁無敵大海景的居住環境。不過，在天文台前台長林超英的角度，極端天氣越見嚴重，住海邊其實不是明智選擇，去年山竹襲港，杏花邨及海怡半島有辦你睇。林曾力數落地玻璃的不是，今次再加多腳，「唔好住咁近海邊」；而空氣污染，東西北都各有問題，「好嘅坐向亦唔係座北向南，而係向南偏東」。林的睇法顛覆大家揀樓概念，你可以信風水，也可以信這位氣象學家所言的「真風真水」。

相約林超英到紅磡碼頭舊巴士總站訪問，甫見面他便說︰「嗱，住得太近海邊，風吹上嚟會潮濕好多！」回南天時相信很多香港人會明白。若果風來得合宜，其實可令家園冬暖夏涼，所以傳統有云，住宅座北向南最好，不過林超英解釋最好應該是向南偏東，「咁就夏天吹西南風都入到屋，而間屋向南，亦唔會太多陽光入到屋，令間屋唔會太熱，冬天太陽低一啲都有陽光入屋，間屋又會暖啲」。林超英的家，正是附近的紅磡海逸豪園，一個市區臨海豪宅盤。山竹襲港時，屋苑都有不同吹爆玻璃等事故發生，他稱家園沒有意外發生，「我揀住內園，（樓層）高度啱啱好睇到樹林，由窗望出去就好似一幅畫」。

同屋苑的臨海單位，卻沒有這麼「好彩」。山竹襲港期間，紅磡最「出名」就是吹甩玻璃，紅磡碼頭亦受湧浪威脅，「呢度係追風聖地。如果山竹再近啲、再強啲嗰時登陸，海水有機會再升多兩米，水位已經到咗呢個位」，林超英指指腰間位置，若真有風暴潮來襲，「因為黃埔碼頭去到內街都係冇高山，完全係平地，估計（海水）可以去到黃埔街咁遠」。

他認為，九龍及港島的海岸很多是以前填海出來，當時預計打風時水位不會太高，到現在市區很多建築物都貼近海邊，「例如港島北面、由堅尼地城到筲箕灣，然後九龍半島南面，油麻地到尖沙嘴然後到紅磡，個海岸都係比較低，所以如果打風嗰陣風暴潮嚟到，呢啲海岸線都有機會受水浸威脅」。

打開地圖，看林超英所指的地區，不少都住宅林立，過去颱風襲港時亦是新聞常報的水浸熱點。林超英稱，氣象學關心的不止是風雨，還有二次災難，住得近海邊又住低層，風暴潮大到撲入家園；但住得高亦有問題，就如去年的杏花邨，海水上升後波及電錶房，令電力中斷，影響居民生活。

究竟住宅距離岸邊多遠才算安全？林超英指不能一概而論，但認為市民無論置業或租樓，都要觀察住宅與海岸有否相應距離，「如果打風，吹起嘅風暴潮會唔會威脅屋企安全？會唔會風大到開唔到窗？平時又有冇適當嘅氣流，令環境變得舒暢？呢啲都要留意」。

記者：黃詠茵