Yanny貪小便宜戀上髮型師

有「冰山美人」之稱的Yanny，初中時因滿面暗瘡，變得毫無自信，加上讀女校出身，畢業後才首嘗初戀滋味！

組合Super Girls成員Yanny（陳穎欣）外冷內熱，身為女神的她原來有不為人知一面，中二時因滿面暗瘡而大感自卑，她說：「嗰陣唔識處理，求其買啲粉餅去遮，但又唔識落妝，搞到皮膚愈嚟愈差！雖然之後醫番好，但都有後遺症，依家啲皮膚變得好易敏感。」加上讀女校關係，她求學時鮮有與異性接觸，畢業後才第一次拍拖。

感情世界平淡似水，Yanny自爆只談過三次戀愛，初戀男友是髮型師，全因她想電負離子，但讀書時沒有錢，獲提議做髮型模特兒，只需付100元便可電髮，結果一時貪玩結識了初戀男友：「我係勁乖勁保守嘅人，好似古老年代啲書友咁！佢約我去街，我又唔去，傾咗一年偈先一齊。」可惜隨着雙方慢慢成長，追求目標變得不一樣，感情最後無疾而終。至於現時與音樂監製陳考威拍拖三年，她笑說：「我哋兩個都係悶嘅人，唔係好刺激，又唔係成日出街，好平淡嗰種人。」

拍親熱戲 男友唔Mind

Yanny近年簽約古天樂旗下，拍戲機會比以往多，問到男友可會介意她拍親熱戲？她欣賞對方夠豁達：「佢覺得都係做戲啫！佢知我係好保守嘅人，我自己擔心多過佢擔心啦！知我唔會亂嚟。」雖視對方為終身伴侶，但現階段不急於結婚，因無法一心二用：「啱啱簽咗電影公司，好想喺電影方面有啲成績，而佢就開咗新Studio做另一範疇，大家都為事業努力緊。」

Profile

年齡：30歲

身高：1米65

嗜好：煮食、睇戲、同動物玩