雅虎香港新聞 【電影LOL】竹內結子逝世 回顧2套盡顯演技電影作品
2020年真係好難捱，香港社會動盪令人憂心，全球又受新冠病毒疫情所困經濟大受打撃，而今年不幸地有好多受喜愛嘅藝人接二連三離開我哋︰影視界配音瑰寶譚炳文、台灣藝人小鬼黃鴻升、日本男星三浦春馬，近日再嚟有「日劇女王」、「笑顏女王」之稱嘅竹內結子，令人不勝唏噓。
竹內結子16歲出道，憑住甜美嘅笑容同紮實嘅演技成為電視劇女王，喺韓風未起日劇當道嘅千禧年代，大台仲出到大熱劇集嘅年代，個個星期六、日都會播日劇，當時仲會睇竹內結子同江口洋介、山下智久主演嘅《午餐女王》，仲有同長瀨智也合作嘅《巨星夫婿》，當然唔少得同男神木村拓哉談情嘅《冰之驕子》！
不過真正令竹內結子紅遍亞洲嘅一定係2004年同中村獅童合作嘅電影《藉著雨點說愛你》，當年套戲日本勁收47億日元，成為該年日本票房季軍，連ORANGE RANGE主唱的電影主題曲《花》都大賣一百萬張，成績驕人，成為純愛電影殿堂級作品。
電影改編自市川拓司的同名小說，由曾拍日劇《美麗人生》和《GOOD LUCK》嘅導演土井裕泰執導。故事講述身體孱弱嘅秋穗巧 (中村獅童飾)在妻子澪 (竹內結子飾)過世後，與六歲的兒子佑司(武開証飾)相依為命。佑司一直未忘一年前澪臨終前的說話：「明年雨季來的時候，媽媽一定會回來看你們」。而雨季確實為巧及佑司帶嚟六星期嘅奇績。
《藉》應該係最早期嘅穿越劇，因為竹內結子其實係因為車禍而穿越到未來，於雨季中與巧及祐司過短暫而幸福嘅生活。竹內結子飾演嘅澪賢良淑德仲好溫柔，為咗兒子訂定生日蛋糕到18歲，睇到人淚流不止！
另一套令人喊到收唔到聲嘅仲有上年7月上映嘅《漫長的告別》。故事講述年邁父親昇平（山﨑努 飾）患上認知障礙症後，母親曜子（松原智惠子 飾）對丈夫不離不棄努力維繫著家庭。一家人各有煩惱，但在陪伴父親的最後七年時光，讓她們重新感受親情，從而改變了人生，告別是漫長的，回憶退色，愛仍存心中。
麻里因為丈夫工作關係，和兒子崇（蒲田優惟人 飾）一起移居美國，卻因為語言難以融入當地，即使係講同樣語言，佢同丈夫兒子亦關係疏離，竹內結子將孤立無援、寂寞、無助演得相當真實細緻，到後來決定向失智嘅爸爸坦白自己嘅困境一幕，竹內結子未開口，觀眾已經噴眼淚！
當時宣傳比較著重喺男主角山﨑努及飾演細女嘅蒼井優身上 ，其實飾演嘅大女麻里嘅竹內結子仲演得相當出色，建議大家搵返嚟睇。對於又一個好演員離開感到可惜，有喜愛嘅演員歌手就唔好錯過佢地任何演出，因為唔一定有下次，各位要珍惜眼前人！
更多電影文章
【電影LOL】《花木蘭》有錢賺 迪士尼唔敢搏《黑寡婦》延期上畫
【電影LOL．今個星期睇咩戲】《聖荷西謀殺案》《可不可以，你也剛好喜歡我》《鋼鐵雨2：核戰危機》《奇蹟車站》《孤雁和你飛》
