【賀歲片巡禮】李居明一次過上兩套戲 講發達又講問米

今個賀歲檔仲有2套好有趣嘅電影想推介俾大家，就係好應節又好多人想知嘅發財秘笈電影「大迷信」系列30周年紀念作《致富者聯盟》，以及應該上農曆7月14但唔知點解賀歲嘅問米電影《通靈師》！

2部電影都係由玄學大師李居明及其公司智富電影出品，專門製作同易經、八字命理、風水等相關嘅題材電影，之前已經推出過《大迷信3潮爆開運王》及《豬年運程》，電影主要於新光戲院（Super 3 Cinema）獨家播映。雖然屬小眾電影又同電影金像獎無緣，不過智富電影好認真，唔係玩玩下，同其他電影公司一樣參加國際影視展，仲參加康城影展！

今次一連推出2部，《致富者聯盟》首部由全方位講述如何致富的奇趣大電影，李居明大師最厲害的發達風水秘笈、食物改運學、人體磁場改運學等傾囊相授，拍攝成風水實例大電影，教你如何用風水命理發達搵第一桶金！電影用足三年拍攝，橫跨南北半球拍攝、跨七國拍攝外景，外景遍及美國紐約、亞特蘭大，加拿大卡加利、杜拜、澳洲墨爾本、悉尼、日本東京、法國康城、摩纳哥等地，勁過唔少電影！

《致》仲有石修、陳宇琛、陳自瑤、黎芷珊、莊思敏、魯振順等人參與演出，加上戲中不停出現金磚、金雞翼等，真係好應節。最神奇係佢會喺K11 Art House放映，唔通喺貴價戲院上會有助致富？

而另一套似鬼片多過賀年片嘅《通靈師》，同屬「大迷信」系列電影嘅佢將會接力上大年初八，集中火力講咩係問米，仲會有中、日、美、台問米通靈師比拼，睇下邊個更好功力。戲內仲有與觀眾互動環節，由日本大師幫你祈福，其中一個宣傳點就係請觀眾入場前諗定有咩願望，咁到互動環節時就可以許願！

「大迷信」系列其實更似真人show或綜藝節目，而且噱頭十足，如果你年年都會睇生肖運程，又或者信奉風水命理，咁買張飛入場有機會致富同許願，其實都好抵下！