與麥玲玲甜蜜合唱《好好戀愛》洗版 Bob：對唔住囉

無綫音樂節目《流行經典50年》自播出以嚟，邀請唔同嘅歌手及藝人上節目唱出經典金曲，勾起觀眾嘅集體回憶及成為熱話。喺噚晚節目邀請咗黎耀祥、肥媽、林盛斌（Bob）、麥玲玲、陳家樂、孫慧雪、李靖筠及商天娥等等擔任嘉賓，當中Bob同麥玲玲嘅演出環節為觀眾帶來驚喜，更喺網上成為熱門討論話題。

喺噚日最新一集，一班演員上節目為賀歲電影做宣傳，期間佢哋仲唱出經典歌曲，陳家樂及李靖筠唱《刻不容緩》、Bob及麥玲玲唱《好好戀愛》，同埋孫慧雪及區永權唱出《來日方長》。Bob同麥玲玲重新演繹《好好戀愛》時手拖手勁投入咁唱，最後仲嚟個深情對望，隨即受網民追捧。

Bob亦喺社交網站上載電視截圖及留言話：「得㗎嘞，夠嘞，我知呀，唔駛再Whatsapp同PM我，對唔住囉.....」唔少網民仲留言話好正同讚佢哋唱得投入：「一於情侶檔，搵真銀」、「好好笑喎 勁正」、「真心忍唔住笑」、「新晉組合」、「樂壇欠你一個獎」及「冇得頂呀」等等。除咗吸引網民留言之外，連藝人都有份留言，好似有黃翠如：「我要片」、陳家樂：「唱得好投入呀」、林子善：「最正係唱完個一幕，你做乜嘢將隻手擺喺師傅個心口度」及孫慧雪：「正到爆！」等等。