羅拔唐尼唔做《鐵甲奇俠》新作點解伏味濃？

大家都好關心羅拔唐尼（Robert Downey Jr.）唔做《鐵甲奇俠》，離開漫威超級英雄宇宙嘅佢有咩新搞作。當大家期待因為做「挨人man」賺落好多片酬唔憂生計嘅佢會一改戲路，專挑小眾作品挑戰演技，定係發掘新icon製造另一個鐵甲奇俠之時，佢選擇拍合家歡喜劇《怪醫D老篤》。

《怪》改編自英國作家Hugh Lofting嘅同名兒童小說，講述主角Dolittle可以同動物溝通及引發一連串趣事，故事先後兩度被改編成電影，分別係60年代拍成Doctor Dolittle以及1998年由Eddie Murphy主演嘅《D老篤日記》。60年代版票房失利，差啲搞到當時做出品嘅霍士電影破產，1998年翻拍就好成功，電影仲有續集！

《怪》第3次改編經典兒童故事，由巨星羅拔唐尼做男主角，Antonio Banderas同Michael Sheen做配角，3大男星主演咁都未夠！仲搵埋超多星幫班動物配音，包括同蜘蛛仔Tom Holland再次合作，仲有007新任M Ralph Fiennes、今年攞奧斯卡影帝嘅Rami Malek，英國影后Emma Thompson、法國影后Marion Cotillard同《NASA無名英雌》嘅Octavia Spencer聲演，成個演員陣容夠拍幾套奧斯卡得獎影片！

套戲剛剛出咗電影海報同預告片，可惜反應好一般。話說呢套落重本用咗1億7千5百萬美金拍攝，賣點係男主角羅拔唐尼掛帥嘅喜劇，可惜條預告片平平無奇，外媒Hollywood Reporter直頭狠批預告片零新意無驚喜，畫面見慣見熟，特效超越唔到《魔幻森林》，故事亦不見得可以勝過《獅子王》。最出事係男主角一啲都唔突出，是但搵個男演員上陣都得，㗰哂羅拔唐尼云云！

外媒睇淡事出有因，其實《怪》原定於今年4月上映，不過Stephen Gaghan導演嘅初剪版本效果強差人意，一向拍開《油激暗戰》等政治題材電影嘅佢雖然攞過奧斯卡同金球獎，不過就無拍過合家歡笑片，一嚟就挑戰拍咁大budget嘅家庭片又真係幾大壓力。既然效果麻麻，電影公司唯有加碼重拍部份場面，仲搵嚟《異形侵略戰》、《忍者龜：變種新任務》導演Jonathan Liebesman幫忙重拍部份。

電影鐵定2020年1月中上映，香港就上賀歲檔。由羅拔唐尼主演嘅合家歡電影相信香港成績唔會差，不過要破票房紀錄就有一定難度，因為電影要重拍似乎預告咗套戲頂多不過不失，好睇極有限！羅拔唐尼呢次轉型有機會「炒車」收場，fans們會唔會好失望呢？