【有無見過？】本年度Yahoo十大熱搜高質人氣改圖出爐

今時今日，大家想知啲咩、八卦啲咩，只要簡單喺搜尋引擎網站輸入關鍵字就可以搵到，真係快捷方便。一年容易又年尾，唔少排行榜都紛紛出爐，究竟大家今年喺Yahoo熱搜得最多又係咩呢？而家就同大家回顧一下今年熱搜高質人氣改圖啦！

Captain Nancy第七粒寶石

早前《復仇者聯盟3：無限之戰》喺香港上映，唔少人都諗緊剩低嘅無限寶石喺邊度？！有創意網民就諗到家燕姐額前大痣發出死光同Thanos決一死戰，仲話原來第七粒寶石就係喺家燕姐度。一向玩得嘅家燕姐都出圖回應玩埋一份，仲上載咗宣傳海報。圖中家燕姐手持盾牌，額上有寶石發出死光，佢仲喺社交網站留言叫大家放心，寶石仲喺佢度，佢會全力保護池力共鎮。

陳豪被「塗黑」港版《黑豹》

創意無創嘅「連登仔」喺5月嘅時候，將陳豪喺劇集《天與地》嘅劇照改圖，仲改到同《黑豹》零違和感。網民除咗將陳豪「塗黑」之外，仲將佢Key入帶領Wakanda戰士衝向敵人嗰一幕度。

崔世安及林鄭加入小熊維尼家族

相信唔少人都記得13年嘅時候，習近平同前美國總統奧巴馬喺加州莊園散步，之後一張小熊維尼同跳跳虎散步嘅相就被瘋傳。港珠澳大橋喺10月舉行開通儀式，除咗香港行政長官林鄭月娥及澳門行政長官崔世安出席之外，連國家主席習近平都出席主持儀式。今次小熊維尼又出現啦！有網民將林鄭惡搞成豬仔piglet，而崔世安亦被惡搞成驢仔Eeyore。

颱風山竹

超強颱風「山竹」喺9月吹襲香港，路面塌樹未清理好嘅情況之下，搞到交通大癱瘓，一班打工仔都要千方百計「搵路」返工。創意網民除咗將一個打工仔面對住塌樹嘅相P成電影海報之外，仲有將「山竹」風眼及放工改圖，發揮無限創意。

CatGirl

90後網紅CatGirl喺15年開設影片頻道，頻道內容主要係旅遊同埋飲食，唔知大家有冇睇過呢？經常被網民批評佢嘅身型，但佢冇有怕，一於繼續做自己。喺今年10月，佢去咗布吉島旅行，仲上載影片同大家分享，佢以三點式泳衣亮相，點知引起連登仔搞咗個「連登第一屆Catgirl整形比賽」，將佢瘋狂改圖。

POP子與PIPI美的日常

由漫畫家大川武久部創作嘅漫畫《POP TEAM EPIC》，原本係一個4格漫畫，但因為畫風魔性，誤打誤撞被網民瘋狂改圖，更加網絡掀起改圖熱潮，成為「年度最毒表情包」。

其餘結果如下：港版哈利波特特輯、【2018香港小姐】佳麗改圖大賽、Facebook小編DM改圖、旅行青蛙改圖。