【多倫多影展】奧斯卡指標出爐 Scarlette Johansson唔做黑寡婦 做人阿媽搏拎影后？

加拿大多倫多影展(TIFF)剛剛於星期日閉幕，近年TIFF越做越出色，規模及知名度暫時稍遜於康城影展或威尼斯影展，不過抱住「以電影影響生命」嘅宗旨，用心選片嘅關係喺業界有極高認受性，參加得嘅都真心為電影，唔會有一堆衣著古怪、趕極唔走嘅紅地毯「明星」，因為唔係俾錢就有得行囉！

無紅地毯「明星」不過有真正影星，近年TIFF成為「奧斯卡」前哨戰。上年獲得影展People’s Choice大獎嘅《綠簿旅友》仲贏埋奧斯卡最佳電影！其他奧斯卡得獎電影《被奪走的十二年》、《星聲夢裡人》、《廣告牌殺人事件》等，通通先喺TIFF試水溫，反應良好就出盡力谷行入奧斯卡，所以大把荷里活影星肯去多倫多影展造勢，今年出席巨星有Tom Hanks、Nicole Kidman、Kristen Stewart、Leonardo DiCaprio、Jennifer Lopez等！

今年People’s Choice大獎由《雷神奇俠：諸神兼昏》導演Taika Waititi執導嘅《Jojo Rabbit》獲得。故事講述10歲男童Jojo (Roman Griffin Davis飾）於世界大戰二戰期間，身為希特拉少年團成員，全程投入納粹主義， 直至一日發現自己媽媽Rosie（Scarlett Johansson飾）一直暗中幫助猶太人，將嘅猶太少女Elsa（Thomasin McKenzie飾）藏身其家中，信念開始動搖！

二獎為《愛．對抗》導演Noah Baumbach執導嘅Marriage Story，講述劇場導演Charlie（Adam Driver飾）與劇場演員Nicole（Scarlett Johansson飾）育有一子，Nicole想帶埋仔仔到洛杉磯拍電視劇，希望藉此事業更上一層，Charlie則蔑視電視一心只想留係紐約繼續其舞台劇創作，因為分隔千里令兩人關係越見緊張。本來打算為兒子和平分手，結果因為離婚律師介入而關係越演越激烈。

三獎為韓國導演奉俊昊執導嘅《上流寄生族》，由一家四口都係無業遊民，做人無咩希望，直至長子基佑(崔宇植 飾)虛報學歷做咗神秘富豪(李善均 飾)子女的補習老師，一家人得以「共享」上流人的榮華富貴，但無止境的貧富差距最終令人性失控......

《上流寄生族》喺影展獲獎無數，早前已經奪得康城金棕櫚大獎，今次再下一城，估計一定攞到奧斯卡最佳外語片提名。至於會唔會可以好似《羅馬》咁以外語片贏到其他奧斯卡獎項，就好睇有無荷里活大片廠幫手造勢。

Jojo Rabbit評價極好，而且具備商業元素，有勁多知名影星如《廣告牌殺人事件》Sam Rockwell、肥amy Rebel Wilson等客串，電影公司亦俾足力做宣傳，睇勢想谷票房又想攞獎。而Marriage Story描寫感情關係非常入肉，有機會提名劇本獎項。

三套得獎影片其中兩套都有Scarlette Johansson份，無咗超級大片《復仇者聯盟》系列喺手嘅佢，反而多咗空間拍其他類型電影，睇個勢分分鐘有機會憑Jojo Rabbit或者Marriage Story嘅角色迎來演藝生涯首個奧斯卡提名！