內地電影中秋檔怪現象 口碑麻麻 票房依然過億

影評同票房有無必然關係？喺內地似乎無一定關聯性，話說中秋佳節檔期新片，分別有日本動畫《名偵探柯南：紺青之拳》、國產片《小小的願望》及《誅仙》，柯南動畫一向有捧場客，懸疑查案故事亦寫得十分札實，票房排第二，上映3日錄得人民幣1.6億票房，動畫片算成績相當不俗！

而排第三位最高票房嘅有《我的少女時代》王大陸、魏大勛及彭昱暢主演嘅《小小的願望》，3日收1.4億人仔。故事講述高中生高遠有肌肉萎縮症，身體狀況越嚟越差，而佢唯一願望就係脫離處男行列！為咗達成願望，其好友徐浩及張正陽決定不惜一切幫佢實現破處夢想！

《小》睇故事有青春、有後生演員仲有勵志橋段，睇到人熱血沸騰大唱夕陽無限好！不過《小》似乎正能量不足，因為網友喺內地電影網「時光網」上評價幾低，10分滿分套戲平均得5.5分，唔知同電影一波幾折有無關係？

《小》改編自韓國電影《偉大的願望》，不過據聞因為「市場需求」而改名做《小小的願望》，映期仲由6月推至上星期上映。最神奇喺對白無哂「破處」、「性」等字眼，因為「技術原因」而修改咗幾多就不得而知，只係知套戲依家笑片又唔係、勵志又唔夠，仲被網民嫌棄猥瑣！

而最高票房就由出預告片到正式上映都一片負評嘅《誅仙》奪得，3日錄得2.7億人民幣票房。電影由網路小說改編，2016年曾經改編成電視劇《青雲志》，由內地小生李易峰、小花趙麗穎及楊紫主演，劇集推出時大受歡迎，跟手出埋手機遊戲，儲落唔少fans。

由程小東執導嘅《誅》以仙、魔做背景，簡單講就係一班年青仔女為咗武功、正邪同感情而上演嘅恩怨情愁，原著小說篇幅及角色眾多，要濃縮成電影都幾有難度，期望越大，失望越大，電影版故事眾望所歸地改到不似人形，結構鬆散。

而且成套戲充滿電視劇級數嘅電腦特效，最慘係用人氣演員都幫唔到手，女主角孟美岐人氣爆燈，可惜演技被瘋狂劣評！不過奇就奇在明知伏味濃，票房依然高開，整體票房比上年中秋檔多出2億！

內地拍戲題材限制多多，造就大量超現實神仙劇，可能因為無得㨂，所以明知戲爛都要睇，唯有睇完繼續鬧，所以先有咁多低評分高票房電影？