梁競徽馬來西亞開個唱賀入行20年 內地網民：什麼時候來内地

梁競徽（原名梁烈唯）轉眼間已經入行20年，為隆重其事，佢噚日就喺微博宣佈將於下年2月喺馬來西亞雲頂舉辦首個音樂會並留言話：「入行20年～～～人生中的第一次～希望一切順利～留下一個美好回憶給自己和所以（有）來支持我的朋友❤️2020年2月9號～馬來西亞雲頂星劇場～梁競徽個人首次音樂會😘#梁烈唯超話#梁競徽326超話#演唱會##馬來西亞##雲頂#希望看到您」。

現年40歲嘅梁競徽，1999年參與電影《監獄風雲之少年犯》正式出道，入行多年都係以拍劇為主，雖然都係飾演配角居多，不過當中有唔少經典角色，例如《缺宅男女》關嘉康（關二哥）、《使徒行者》木虱、《飛虎》莊卓源及《鐵探》快活谷等等。至於唱歌方面，佢係冇個人單曲，除咗大型節目或登台表演之外，大家都冇咩機會聽到佢唱歌，究竟佢會喺現場會唱咩歌，大家就真係要拭目以待喇！

一向愛國愛港嘅梁競徽，今次舉行演唱會嘅地方竟然唔係內地，反而選擇喺馬來西亞，唔少內地網民知道消息後都希望有機會睇到佢喺內地演出，紛紛留言話：「支持徽哥，一切順利，也希望内地可以有」、「什麼時候來内地啊，北京歡迎你」、「我都想去啊，來廣州開嗎」、「預祝演出順利哦(´-ω-`)有機會考慮下全國巡演哦」及「來内地開演唱會呀，那麼多人喜歡你，應該來呀」等等。