《小姐與流氓》翻拍成真犬版 「男主角」故事好勵志

經典動畫《小姐與流氓》（Lady and the Tramp)鐵定翻拍成真人版(真犬版？），預計於迪士尼串流平台上播映。近日迪士尼喺twitter公佈咗《小姐與流氓》嘅主角照片，其中男主角嘅經歷絕對係勵志正能量、人生滿希望嘅典範！

「流氓」1角將由一隻2歲左右嘅爹利混種狗仔Monte飾演，佢原本係流浪犬，後來入咗美國鳳凰城嘅流浪動物收容所。雖然唔駛日曬雨淋同捱餓，不過入咗收容所唔等如狗生平穩，如果無人領養亦難逃被人道毀滅嘅悲慘命運！Monte狗生先苦後甜，佢被轉送到不同收容所，最後被送到HALO Animal Resuce後，開始行大運！

《小》製作人參觀收容所時遇上Monte，睇中佢外型兼活潑又親人嘅性格而決定㨂佢做「流氓」，Monte被領養之餘仲搖身一變身成為狗明星！處男電影仲得到唔少紅人撐場聲演，「流氓」本身由參演《司法女王》飾演Mel Wulf嘅Justin Theroux配音，女主角「小姐」就由《雷神奇俠：諸神黃昏》「女武神」Tessa Thompson聲演！

雖然真人版《小姐與流氓》主攻迪士尼自家串流平台，不過配音陣容絕對俾力，除咗以上兩位上位中紅星，喺《奇異博士》入面好搶鏡嘅Benedict Wong、《星夢情深》做Bradley Cooper哥哥Bobby嘅Sam Elliott及《NASA無名英雄》飾演女主角Mary嘅Janelle Monae等亦喺名單之中，呢個cast加埋都夠拍套Marvel超級英雄！

《小》呢個狗界愛情經典故事本身有一定吸引力，加上男主角Monte本身麻雀變鳳凰咁勵志嘅經歷，幫套戲大大加分！希望借《小》可以宣揚「領養不棄養」訊息，幫助更多等待領養嘅狗狗尋家。

電影預計於今年11月，即係Disney＋開台時出街，暫時平台先於北美地區試行，香港觀眾可能要等多陣先有得睇。