【買車理財】買車養車使費逐項幫你計

為避疫唔少人想買架私家車代步,不論買二手或供車,入場費萬零至數萬有交易,但計埋養車成本,真正入場費就可能多一大截。

上會定私人貸款

買新車的話,唔少人都會考慮上會。上會一般分汽車貸款租購(Hire Purchase, HP)及汽車貸款租賃(Leasing)。前者賣點係毋須支付首期,亦有部分由汽車代理提供的HP貸款要求支付車價一成作首期;後者需要支付首期,首期計法係還款年期加一,例如還款期兩年就要支付三個月供款作首期,貸款利率一般會較低HP低,亦有部分車行提供回購配套,例如車主頭三年只需要供車價55%,餘下45%由車行作保證回購,合約完結後車主可選擇將車交回予車行,又或補價換車,適合喜歡揸幾年轉新車的用家。

上車會好處係可由車行或代理代辦,可以較輕鬆入手廿多萬起的新車,大前提係應付到供款。不過上會後「牌簿」會被扣起,並要強制購買汽車全保,保費較第三保貴一截。至於用私人貸款買車就勝在較具彈性,而且息率較平,另外亦可以利用貸款買二手車,既可以慳40%起標的首次登記稅,又可以大大擴闊揀車範圍。另一優勢係「牌簿」自己Keep,換車、續牌亦較為方便。

不論係上會或借私人貸款,出車後你每月都需要應付至少六、七千供款,加上雜費每月養車開支就過萬,所以買車前一定要計數,衡量供車養車後還有多少子彈應付生活所需。

避不開的使費

養車有唔少避不開的使費,首先係年年要交的牌費。即使你買1500cc以下家庭車仔,年度牌費要$3929。近年流行七座豪華MPV,唔過2500cc年度牌費彈至$5794。想慳牌費最強反而係電動車,唔過一公噸電動車年度牌費只係$440,過一噸就每250公斤加$95,而市面上不少電動車款年度牌費都唔過$1000。不過電動車定價較貴,保養維修都要依賴原廠或具規模維修中心,泊車亦要考慮叉電問題,一來一回是否值得就見仁見智。

另一避不開使費係驗車,不論係買新車或二手車都需要安排「上架」驗車,看看車輛有沒有問題。較具規模的驗車中心,「上架」驗車收費千三至千四不等。另外車齡6年或以上每年都需要驗車,取得「私家車車輛宜於道路上使用證明書」才可以申請續牌,指定驗車中心私家車收費$585,想就腳些可以找相熟車房驗車,另一優勢係發現有問題可以即時維修,不過收費就較貴,由一千到二千不等(不包維修/更換零件)。

泊車係車主頭痛難題亦是不能避免的開支。港九新界各區月租車位價錢有相當落差,例如多中產進駐的將軍澳月租車位閒閒地逾四千,但港島北角月租車位二、三千卻不乏選擇。另一難題係一些地區車位明顯供不應求,車主甚至要跨區泊車,所以買車前最好先認真了解居住地區車位供求情況。

買車不能避免開支還有保險,法例規定至少要買第三者保險,想保埋水、火、意外引致車輛損壞就要買全保。不論車保或全保,計算保費都會按汽車市值、車主駕駛年資及駕駛紀錄計算,新手車主與駕駛紀錄良好資深車主,保費可以相差逾倍。

還有一樣車主一般都不會慳的開支就係清潔,除了一般洗車,近年亦流行汽車鍍幕,收費約三、四千元。另外疫情下大家都關注消毒,車廂內籠清潔消毒約$800起,正因為每年都有大堆雜費,有意買車最好幫自己做一做壓測,假如養車使費超過月薪一半,就應該再三考慮一下了。

伸延閱讀:

【買保險】朋友搵你買保險點算好?

【借錢讀書】撲水進修應該點部署?

【Claim保險】拆解熱門保險索賠手續

【失業點算】疫境慳錢留儲備!2萬收入半年生活費預幾多?

【7日賺高息】2020最新5大熱門外幣定期優惠比較