譚仔不如開 立食無人店

坦仔CEO接受訪問,除了透露會再開分店及衝出國際,長遠目標係上市。既然小米招股時都把自己定位為科網股,外國Domino Pizza亦因為勇於創新,被股民視為科技股,坦仔要照搬此方程式又可以點做?

坦仔若以純餐飲業務上市,好處係簡單易明,但弱點係業務有數得計,未能將估值谷至最大化,加一點創科概念,就有助推高估值兼加一點噱頭。概念嘅嘢,最緊要係引發想像,所以小米及Domino Pizz所謂創科概念都唔係瞓身大搞,而係逐啲逐啲起動,勾起投資者憧憬就夠。所以坦仔搞創科,大可以多元化地搞,而每樣都只需要起步規模就夠。

創科概念最基本係人有我有,既然無人概念店大熱,坦仔不妨先搞一、兩間24小時坦仔立食無人店。所謂無人,主要係前台店面無人,後台仍有廚房運作,顧客利用觸屏點餐再擦卡就可以等食,用餐完畢把成盤嘢送入回收口就獲贈點數,儲十點即可以免費食一次。當然點餐屏幕的聲音導航,就必定選用坦仔阿姐風格才夠親切感。

 

坦仔阿姐聲音導航

另一必須開拓的戰線係外送服務,Domino Pizz採用無人機送餐俘虜外國年輕顧客歡心,此方法亞洲城市未必適用,取而代之係優化外賣員配備組合。外賣員固然要配置電子支付收費器,此外,考慮到坦仔招牌米線以配料加熱湯的組合,可參考球場賣啤酒的保溫桶,設計出可以揹上身的保溫熱湯桶,再加一部配置多層配料格手拉車,外賣員就可以按電子點餐資料,在顧客家門前即席炮製米線。顧客選用家中的大碗公更可以扣減一元,為外賣服務增添環保概念。當然此服務只適宜在毗連大型屋苑分店試行,午市時份柯打閒閒地十碗八碗的商業區就未必行得通。

至於餐點設計,亦可以注入創科概念,例如與乜乜科企合作利用人工智能研發新口味,又或引入智能慢煮推出高級版「份子土匪雞翼」等等。有了創科概念支持,就可以對沖市場飽和、分店太多等憂慮,甚至連採用同股不同權方式上市投資者照樣受落,日後管理或安排分紅就更具自由度也。

上市前,還有一個問題要解決。

如果大家有睇譚仔最新宣傳,是以部份員工口音「坦仔」自稱,稱碗米線有「旦旦坦仔味」(淡淡譚仔味);既然「坦仔」如此深入民心,連官方都用,不知道CEO有沒有考慮過譚仔會用「坦仔」上市呢?譚仔與三哥分庭抗禮多年,唯獨「坦仔味」如一,既然上市名稱向來風馬牛不相及,那倒不如用「坦仔」上市,似乎比三唔識七更好。

===============

精選資訊網站「中環街市」 臉書粉絲頁