【理財出行】想學李小加跨境購物？ 其實唔難

港交所李小加策動大刁收購倫交所，首富誠哥多年來又密密收集海外資產，想學佢哋海外購物其實唔難，今次就介紹兩大港人心儀地區英國及日本。

英國股票一股有交易

近年英鎊一跌再跌，英國股市亦平絕已發展國家，對未夠子彈買英國樓的投資者來說，英國股票不失為走出去趁低吸納的選擇。

英國股票的隱憂大家都很清楚，拖至沒完沒了的脫歐亂局，直到今日仍未見end game跡象。但投資往績不俗的挪威主權基金都揚言無論如何都會投資英國，更計劃加注千億美元到英國股市，原因係英國始終是歐洲經濟一股重要動力。事實上即使不時受脫歐形勢衝擊，英國經濟情況仍然唔差，更何況講將來「未知數」，香港可能較英國更令人憂慮，從這方面睇，投資英國股票心理負擔未必如想像般大。

英國股票另一優勢是像美股一股有交易，方便你逐小逐小收齊，大大減輕入貨壓力。現時部分大型券商有提供英股買賣服務，電子落盤佣金15英鎊有交易，約百四蚊港元。鍾情像長江基建的公用股，可考慮擁有校舍、公路、水務資產的HICL Infrastructure （HICL），偏好磚頭則可諗諗British Land Company PLC (PLND)，這隻房託勝在磚頭組合優良兼派息穩定。當然唔想煩，你亦可以直接在港股市場買安碩富時一百ETF，入場費唔使一萬元。

日股留心「奧運效應」

本地保險代理經常講一個例子，就係日本人寧願買保險也不願買股票。日本股市散戶參與度低，原因之一是年長一輩對泡沫經濟爆破印象太深，而且長者投資取態較保守。另一因素是日股入場門檻唔平，間接窒礙年輕投資者對買股票的熱情。

但少散戶參與不代表日本股市「廢」，論近十年爆升動力，日股在亞洲市場中並不失禮兼創21年新高。現時利好因素有明年東京奧運、日本開賭，還有沙特阿美可能選擇東京策動海外上市。

買日股另一吸引之處，是可以入手大家熟悉的企業。例如收購譚仔並發揮其潛在價值的丸龜製麵母企東利多控股，一手約萬八港元就可以上車。唔想大注買日股，經濟一點可以買ETF，例如價值日本ETF，300股一手入場費只需要三千九元。但要留心通常奧運主辦國，在奧運舉行一年股市便會見頂，入手日股明年就要留神見頂風險了。