【扮工收風】老闆跟風玩10yearchallenge

上回講過公司搞創新，希望同事返工之餘都用多啲社交媒體去促進同事之間嘅關係，等大家有多啲火花，可惜慘變「擦鞋勝地」。

呢幾日網民掀起玩#10yearchallenge，全世界貼返10年前舊相自high，懷緬年輕好身材。

話說朋友公司有條擦鞋友，竟然在公司facebook開post鼓勵大家玩10yearchallenge，可想而知係為擦鞋製造機會、為上位鋪路！

果然此post一出，牽頭創新嘅老闆及各部門主管當然唔執輸玩埋一份，一班下屬仲唔搶住擦鞋咩！

明明個樣老咗勁多、身材走晒樣、有幾咁樣衰都好，所有貼圖都係讚好同正評，仲驚見大量嘔心留言，包括「仲係咁年輕！」、「後生咗」、「唯一唔同係眼神，堅定咗！」、「可唔可以教吓我點keep?」

然後演化到又有班Team Head貼十年前嘅團隊相，然後#最強團隊 #十年如一日 #唯一變嘅係戰鬥力 #愈變愈強，真係睇到好多食緊花生嘅同事反晒眼。

好喇，各位親愛嘅同事，收手啦，over咗喇！

===================

19網輕鬆爆料熱線，歡迎舉報老細同事19惡行，立即click入去講畀我哋知啦