去紅館聽演唱會或成絕響?

.
.

繼張敬軒、周杰倫,最新加入取消演唱會大軍還有闊別紅館多年的Eason,恍惚提醒我們隨著香港出現結構性轉變,去紅館聽演唱會好日子有機會成為絕響。但廣大樂迷始終有想聽演唱會心癮,除了過大海去馬交,將演唱會「VR化」或許係另一條出路。

所謂「VR化」原理好簡單,就係當歌手在外地開演唱會時以高清連線直播,再透過VR攝製技術,讓樂迷載上頭罩後,即可以像置身現場參與演唱會。聽起來好搵笨好癡線?舉兩個例子你就會明白習慣咗就癡線都變正常。第一個例子係補習社,補習天王分校遍佈港九新界,但天王人就得一個又唔識分身術,解決方案係網上直播,多年來市場反應係只要天王有號召力,學生其實唔太介意睇直播上堂。

.
.

第二個應用例子係睇波,香港球迷多的是,但親身試過飛去歐洲現場睇波始終只佔少數,但每逢有觸目賽事舉行,你到各區酒吧觀察一下,球迷睇大電視直播,投入感其實不下於現場睇波球迷,甚至有球迷會認為,去酒吧睇波,相對在屋企睇波已經算有現場感及氣氛。球迷例子正好證明,凡事都係講適應同習慣。

參考球迷落吧睇波模式,日後演唱會搞手可以租用Party Room、酒吧,讓歌迷購票入場,載上VR實時「參與」歌手在外地演唱會。搞手更可以聘用專業粉絲帶頭叫喊炒熱個場,讓歌迷盡快投入演唱會氣氛。如果此方法行得通,演唱會搞手便毋須爭紅館期,虛擬香港站的演唱會更本小利大,Sam Hui年年唱都得。而樂壇新人的夢想,亦可能由踏上紅館改為開一場全港有五百間吧、Party Room同步參與的演唱會了。

而事實上,VR演唱會已經有人做,美國Rapper馬龍(Post Malone),上個月就剛剛串流了一場180度的VR演唱會。據了解在一群比較前衛的歌手圈中,因為成本原因,都開始接受這種模式的演唱方法。

 .
.

不過,如果演唱會可以「VR化」,營運商如「樂壇比利」譚伯的藝能環球,就真的上市遙遙無期了。

===============

財經精選資訊網站「中環街市」 臉書粉絲頁