十五歲仔識戴綠水鬼

.
.

早前一宗童黨搶劫案,15歲少年被友人搶去一隻估計價值11萬元的「綠勞」 ,引發城中熱議15歲仔,年紀輕輕已經識得戴勞;有網民感慨咁後生已經「有勞」,自己悔不當初不好好工作。

「綠勞」即是歷年來中港錶迷皆追捧的潛水錶Green Submariner,俗稱「綠水鬼」,外國會叫「綠巨人」。舊版當中,尤其116610LV的「綠面」於9月1日已宣告停產最震撼,LV即是法文的「綠色外框」,因此又有人以「男人的LV」來稱呼此錶。

水鬼系列已多年沒更新,最近公布了第三代新款,回復第一代的圈綠面黑的經典設計,以官方新錶香港建議售價為74600元,聽說「新綠水鬼」炒價已經升了一個開。15歲少年被搶的,應該是舊版「綠水鬼」?市面買少見少,加上今年初官方上調過上代「水鬼」定價,街價如果有,過10萬肯定係走唔甩。

.
.

不過對比其他錶款,「水鬼」門檻較低,功能上又防塵、防水、防震,的確適合後生仔。

咁點解大家繼續咁驚訝?可能因為戴勞「老派」,後生仔戴勞於是就上咗新聞,數年前都有位21歲判頭因戴「地通拿」而一夜成名。如今竟然更加年輕,15歲仔就有勞了。

除了感慨該年輕人有錢外,也不得不留意,疫情下的奢侈品投資增長趨勢,根據外國RealReal的2020奢侈品二手銷售報告,勞力士銷售於疫情下竟然增加了32%,比任何其他品牌增長更大,似乎是市場真的拿勞力士來避險了,而筆者相識的有兩位年輕人手上都有美股和勞力士,所以也見怪不怪,其怪自敗。

===============

精選資訊網站「中環街市」 臉書粉絲頁