【恭喜恭喜！】阿嬌與「醫界男神」賴弘國喺LA正式拉埋天窗

恭喜恭喜！37歲嘅鍾欣潼（阿嬌）喺香港時間今日喺洛杉磯與台灣「醫界男神」賴弘國拉埋天窗，正式升呢做人妻啦！今次Pre Wedding Party邀請咗大約60位親友出席，當中「龍虎蛇」嘅容祖兒（Joey）、蔡卓妍（阿Sa）同埋鄭希怡（Yumiko）就做姊妹，Yumiko囡囡梁浸浸更加安排做花女。

有好姊妹陪伴出嫁嘅阿嬌，身穿白色大Deep V婚紗，雙方喺父母見證下行禮，除咗阿嬌喜極而泣之外，唔少親朋好友都睇到眼濕濕，場面相當感人。

喺婚禮中，新郎賴弘國就話佢哋係嚟自唔同家庭、文化、背景嘅人，阿嬌工作好忙，仲要花時間去維繫呢段感情。之後佢仲喊住話今日行到呢一步，佢真係好多謝阿嬌。遇到啱嘅人係咩感覺，今日行上嚟，佢就有呢種感覺。最後佢仲伏喺阿嬌膊頭度喊。其後，阿嬌就咽哽咁話：「覺得呢段感情真係唔容易，因為咁遠嘅距離，但係大家花咁多嘅時間盡量去見面、去維繫，可能我唔係咁成熟，Michael亦都要時間更加去照顧我⋯⋯我哋會好努力咁互相扶持、互相鼓勵。」

男女主角致詞後，經理人霍汶希（Mani）及「龍虎蛇」都先後上台講感言，Mani話以往都係「龍虎豹蛇」照顧佢，今日好開心，因為多咗個人照顧阿嬌，將阿嬌交俾新郎，佢哋可以休息吓啦！Mani仲話佢自己見證住阿Sa同阿嬌成長，今日好開心，幸福阿嬌係一定要擁有！阿嬌係值得擁有呢個幸福。

賴弘國更喺鋼琴伴奏之下向阿嬌深情唱出陶喆嘅《愛很簡單》，阿嬌聽完更眼眨淚光，場面既sweet且感人。之後就到拋花球環節，阿嬌叫單身賓客出嚟接花球，第一次佢就扮拋，喺第二次預備拋嘅時候，佢直接將花球交俾阿Sa，阿Sa係呢個時候反應唔切，淨係識喺度傻笑。

今次只係Pre Wedding Party，所以係冇簽字儀式，據知佢哋計劃9月返香港補擺婚宴嘅時候，佢哋先會正式簽紙註冊。