Yahoo 行動版

552人追蹤

20多歲女反客為主向男友求婚 網民八個字有力回應

圖片來自Getty Image
圖片來自Getty Image

男仔花盡心思向女仔求婚,好似係大家眼中嘅「指定動作」,但如果情況掉轉,你又會點睇呢?有絲打就借男朋友帳戶,喺討論區開post,開宗明義問大家「點睇女人求婚?」佢話自己會買戒指,但未必要大粒靚鑽石,買嘅款式亦較「男向女求婚」果款平。佢仲問,求婚時駛唔駛俾男友「驚喜」。

面對呢個反客為主嘅情況,有人俾左八個字有力回應:「男女平等,即管去馬。」有網民提出「建議」,話女友可以試下喺公開場合,嚟個「騎士式」求婚。「騎士式」即係點樣?即係女友好似古代騎士咁向愛人跪低,再幫男友戴埋戒指同埋錫手背,「騎士」終於抱得「美人」歸。有人亦問佢「有無咁想嫁」,佢話幾時正式結婚,其實都會同男友一齊決定。

網民:女人求婚好cheap

有網民不留情面話事主「好cheap」(仲要有粗口嚟加強語氣),話佢自身「無乜議價能力」。不過事主唔係太介懷,無同呢位網民開拖,只係淡淡然咁講其實最重要「講感情」:「下下都要計住,自己值幾多,對方值幾多咩?」而且佢話自己同男朋友都一齊咗一段時間,直言唔通仲要同外面嘅女人比去「議價」?再者,佢有呢個諗法嘅出發點,其實係想幫男朋友慳錢。

圖片來自Getty Image
圖片來自Getty Image

另一方面,有網民覺得事主若果真係咁做,其實好甜蜜同浪漫。有人都衷心祝福佢「求婚」成功,可以得到幸福快樂。提出呢個諗法嘅,究竟係咩年齡嘅女仔呢?畢竟好多時都係女方要求男方喺求婚花盡心思,由女方去諗求婚都會引起好奇。事主大方回應,話自己「20頭」,年紀其實尚輕。

而家已經係2019年,科技同社會已經進步不少,可以接受到好多嘢,近年社會風潮都愈來愈重視男女平等。無論係男仔求婚,定係女仔求婚,其實真係無乜所謂,最緊要當事人接受同埋開心,其他人點樣評頭品足真係唔太重要。後生仔女敢作敢為,筆者都祝願呢對情侶可以得到幸福!

來源:連登討論區

相關字:

求婚 女人求婚 鑽石 男女平等 騎士式求婚 戒指