【鑽石筍盤】家底豐厚有車又有樓 御用有錢人黃子雄鍾情搭巴士

無綫劇集經常出現御用角色，好似擁有8分1挪威及8分1蘇格蘭血統嘅黃子雄（Geoff）咁，佢大部份嘅角色都係飾演有錢人或者係企業高層，例如《同事三分親》嘅Vincent、《愛‧回家》嘅Damon及《再創世紀》嘅Paul少等等，所以被封為「御用有錢人」。其實黃子雄唔止係劇中嘅筍盤，現實生活中佢都係一個「鑽石筍盤」。

現年50歲嘅黃子雄，媽媽開辦出版社，仲曾於英國留學，畢業於倫敦國王學院（King’s College London）。1991年返香港之後，講得一口流利英語嘅佢曾經做過市場推廣嘅工作。1995年經親戚介紹佢去明珠台做主持。之後，黃子雄仲得到戲劇總監曾勵珍嘅賞識，搵佢出演《真情》飾演建築師會主席徐應變一角，正式開始佢嘅演藝生涯。

喺唔少劇集中，Geoff都係飾演一個愛溝女嘅有錢人，經常有唔少女伴喺身邊，但現實中嘅佢其實好專一，同前無綫藝員夏竹欣拍拖8年，直至上年因了解而分手，做返鑽石王老五。

回復單身嘅Geoff，享受自己行超級市場同行街買衫。雖然有車有樓，但係佢平時鍾意搭公共交通工具，早前曾被傳媒影到佢行完街搭巴士返屋企。佢仲話自己最喜愛嘅交通工具係渡海小輪，而巴士、地鐵、小巴佢都會坐。佢會視乎方便而選擇乘搭邊種交通工具，不過如果要過海買嘢，佢就唔會揸車，因為搵位泊車佢覺得仲麻煩。其實連之前同夏竹欣拍拖，佢哋都會成日一齊坐巴士。

喺報道中，傳媒仲問佢係唔係唔欣賞比較現實嘅港女，佢就話一般香港女仔好期待搵金龜婿，佢唔係嗰種人。不過佢就話港女絕對唔會欣賞佢，唔會揀佢。至於擇偶條件，佢就覺得同外國人發展嘅機會大啲，因為外國人比較唔太在乎物質上或者錢銀嘅問題，只要大家互相鍾意就可以喺埋一齊。