【幾時「回家」？】博士Mandy暫別《愛·回家》 網民齊嗌唔捨得

無綫處境劇《愛·回家之開心速遞》劇情輕鬆搞笑，一直深受劇迷同網民愛戴，贏盡口碑及收視，喺今年元旦嗰集更突破30點收視。唔少劇中演員成功入屋，當中幾pair情侶仲深入民心，不過最近就有一pair情侶要離開《開心速遞》啦，佢哋就係「博士」馬貫東同「Mandy」謝芷倫，唔少網民知道後都大叫唔捨得，希望佢哋快啲「回家」。

噚晚劇情講到Mandy終於喺橙不忍島坐完監，不過佢唔返香港繼續做大小姐（林淑敏飾）秘書，而係選擇辭職去英國進修法律。而博士就決定放棄香港事業，去英國陪女友Mandy。博士向金城安（周嘉洛飾）、熊心如（蘇韻姿飾）同熊若水（呂慧儀飾）交代速熊嘅工作，最後仲同老闆熊樹根（劉丹飾）含淚道別，場面感人。

博香CP吸引唔少人追看，不過為咗安排謝芷倫暫別劇組，去咗拍攝新戲《法證先鋒IV》。喺上年10嘅時候劇集就講到喺「橙不忍島」入境時過關時，Jenny（陳偉琪飾）將一個橙放咗入Mandy個手袋入面，令到Mandy要坐監三個月。正當大家以為Mandy差唔多回歸劇組嘅時候，噚晚就連博士都暫別劇組。

喺噚晚，馬貫東同謝芷倫都分別喺社交網站發文多謝大家嘅支持：

唔少網民都紛紛留言表示不捨「好唔捨得博香」、「快d返黎呀 今晚最後兩分鐘 你同根叔嘅對話搞到我眼濕濕」、「期待你的回歸」、「等咗3個月竟然寫走咗，仲要你一幕都無，真係好傷心」、「冇咗你哋 唔好睇 失色不少」及「可唔可以唔好走啊」等等。

馬貫東離開劇組之後，佢就已經接拍新劇《致所有愛過的人》（原名《禍後》），同劇演員除咗連詩雅及黃嘉樂等人之外，謝芷倫都有份參與，所以唔少網民都希望佢哋可以再續前緣。